हाङ्गचौं (हाम्रो खेलकुद) – नेपालले चीनमा जारी १९ औं एसियाली खेलकुद (एसियाड) अन्तर्गत क्रिकेटको पहिलो क्वाटरफाइनल खेलमा मंगलबार बिहान भारतसँग खेल्दैछ । खेल नेपाली समय अनुसार बिहान ६ : ४५ मा झेजिङ युनिर्भसिटी अफ टेक्नोलोजी क्रिकेट फिल्डमा सुरु हुनेछ ।

भारत सिधैं क्वाटरफाइनल खेलेको हो । नेपालले समूह ए मा मंगोसियालाई २ सय ७३ र माल्दिभ्सलाई १ सय ३८ रनले हराउँदै क्वाटरफाइनलमा स्थान बनाएको थियो । नेपाल र भारतबीचको खेलमा प्रभाव जमाउन सक्ने दुबै टोलीका प्रमुख तीन खेलाडी यस प्रकार छन् ।

३. कुशल मल्ल(अलराउन्डर)

कुशल मल्ल खेलका प्रभाव जाउन सक्ने नेपालका अलराउन्डर हुन् । कुशलले मंगोलियाविरुद्ध ५० बलमा ८ चौका र १२ छक्कासहित सर्वाधिक १ सय ३७ रन बनाएका थिए । जसक्रममा ३४ बलमै शतक हानेका थिए । कुशल टि२० आई इतिहासकै सर्वाधिक छिटो शतक हान्ने ब्याटर हुन् ।

उनले डेविड मिलर र रोहित शर्माको समान ३५ बलको शतक तोडेका थिए । माल्दिभ्सविरुद्ध तल्लोक्रममा ब्याटिङ गर्दै २० बलमा ३ चौका र ३ छक्कासहित ४७ रन बनाएका थिए । बायाँ हाते अलराउन्डर कुशल तेस्रो नम्बरमा खेल्नेछन् ।

विष्फोटक ब्याटिङको क्षमता राख्ने उनी निडर रुपमा प्रस्तुत हुने गर्दछन् । भारतीय बलरविरुद्ध पनि कुशल हाबी हुन सक्छन् । कुशल नेपालको पार्टटाइम स्पिनर समेत हुन् । राम्रो लयमा रहेका कुशल भारतविरुद्ध हाबी हुन सक्छन् ।

३. तिलक बर्मा (अलराउन्डर)

भारतीय युवा अलराउन्डर तिलक बर्मा ठूलो सम्भावना बोकेका खेलाडी हुन् । आइपिएलमा मुम्बई इन्डियन्सबाट सानदार प्रदर्शनका साथ गत अगष्टमा वेस्टइन्डिजविरुद्ध टि२० आईमा डेब्यू गरेका थिए ।

बर्मा मध्यक्रममा आक्रामक ब्याटिङसँगै स्पिन बलिङ गर्ने गर्दछन् । उनले एक ओडिआई र ७ टि२० आई खेलेका छन् । नेपालविरुद्ध उनी घातक बन्नसक्ने खेलाडी हुन् ।

२. दीपेन्द्र सिंह ऐरी (अलराउन्डर)

नेपालका अलराउन्डर दीपेन्द्रसिंह ऐरी टि२० आईमा लगातार राम्रो प्रदर्शन गर्दै आएका छन् । टि२० आईमा एक हजार रन पूरा गर्ने पहिलो नेपाली खेलाडी दीपेन्द्र भारतविरुद्ध हाबी हुनसक्छन् ।

दीपेन्द्रले मंगोलियाविरुद्ध ९ बलमै अर्धशतक हानेका थिए । उक्त कीर्तिमान अव कहिल्यै तोडिने छैन । दीपेन्द्रले दुई महिना अघि ग्लोबल टि२० क्यानडा खेल्दै राम्रो अलराउन्ड प्रदर्शन गरेका थिए । दीपेन्द्रले ब्याटिङसँगै स्पिन बलिङ र फिल्डिङ पनि त्यतिनै उत्कृष्ट प्रदर्शन गर्ने गर्दछन् ।

नेपालका थ्री डि क्रिकेटर दीपेन्द्रबाट नेपाल सानदार प्रदर्शन चाहन्छ । एसिया कपमा अघिल्लो महिना दीपेन्द्रले भारतविरुद्ध २५ बलमा २९ रन बनाएका थिए ।

२. अर्शदीप सिंह (बलर)

बायाँ हाते तीव्र गतिका बलर अर्शदीप सिंह भारतीय टि२० आई टोलीका नियमित सदस्य हुन् । उनले ३३ टि२० आई खेलमा ५० विकेट लिई सकेका छन् ।

अर्शदीप सिंह स्वींग र योर्करका लागि चिनिन्छन् । अर्शदीप डेथ ओभरमा ६ बलमा ६ नै योकर फ्याँक्न सक्ने खुबी राख्छन् । अर्शदीपमा टि२० विश्वकपसँगै भारतीय टोलीबाट खेलेको राम्रो अनुभव छ । बायाँ हाते तीव्र गतिका बलरविरुद्ध नेपालको इतिहास त्यति राम्रो छैन । अर्शदीपको योर्कर खेल्न नेपाली ब्याटरलाई सहज हुनेछैन ।

१.सोमपाल कामी (बलिङ अलराउन्डर)

नेपालका तीव्र गतिका बलिङ अलराउन्डर सोमपाल कामी खेलमा प्रभाव जमाउन सक्ने खेलाडी हुन् । सोमपाल नेपालका प्रमुख बलर हुन् । नयाँ बलका साथ उनले बलिङ गर्ने छन् । पावर प्लेमा उनीबाट राम्रो प्रदर्शन चाहन्छ ।

अर्कोतर्फ सोमपाल राम्रो ब्याटिङ क्षमता भएका खेलाडी हुन् । स्पिन नेपालका सबै ब्याटरले राम्रो खेल्छन् । तीव्र गतिका बलरमा भने केहि संघर्ष गर्दै आएका छन् ।

तर सोमपालले तीव्र गतिको बलिङ पनि त्यतिनै राम्रो खेल्ने गर्दछन् । सोमपालले एसिया कपमा भारतविरुद्ध ५६ बलमा १ चौका र २ छक्कासहित ४८ रन बनाएका थिए । त्यस्तै पाकिस्तानका शाहिन शाह अफ्रिदी, हरिस रौफ र नसिश शाहको तीव्र गतिको बलिङ आक्रामण सामु सोमपालले ४६ बलमा ४ चौकासहित २६ रन बनाएका छन् ।

सोमपाल वर्तमान टोलीका सर्वाधिक अनुभवी खेलाडी हुन् । ठूला टोलीविरुद्ध राम्रो प्रदर्शन गर्दै आएका छन् । भारतविरुद्ध पनि सोमपालले राम्रो प्रदर्शन गर्न सक्छन् ।

१. यशस्वी जैसवाल

युवा ब्याटर यशस्वी जैसवाल भारतीय क्रिकेटमा आगमी दिनका ब्याटिङका खम्बा हुन् । घरेलु क्रिकेट, उमेर समूह आइपिएल हुँदै भारतीय टोलीबाट खेलि सकेका छन् । बायाँ हाते ब्याटर जैसवाल ओपनिङका साथ आक्रामक रुपमा ब्याटिङ गर्ने गर्दछन् ।

पावर प्लेमा उनको रनको गीत रोक्न जुनसुकै बलरलाई कठिन पर्छ । गत सिजनको आइपिएलमा राजस्थान रोयल्सबाट कोलकाताविरुद्ध १३ बलमै अर्धशतक हानेका थिए । भारतीय टोलीबाट जैसवालले २ टेस्ट र ५ टि२० आई खेलि सकेका छन् ।

टेस्टको डेब्यू खेलमै वेस्टइन्डिजविरुद्ध १ सय ७१ रन बनाएका थिए । गत अगष्टमा जैसवालले वेस्टइन्डिजविरुद्ध चौथो टि२० आई खेलमा ५१ बलमा ११ चौकार ३ छक्कासहित ८४ रनको इनिङ खेलेका थिए । युवा सुपर स्टार जैसवाल नेपालविरुद्ध हाबी हुनसक्ने भारतीय हतियार हुन् ।