एजेन्सी – मलेसियाले १९ औं एसियाली खेलकुद (एसियाड) मा टेस्ट टोली बंगलादेशविरुद्ध २० ओभर पूरै स्पिन बलिङ गराएको छ । चीनमा जारी एसियाड अन्तर्गत अन्तिम क्वाटरफाइनल खेलमा बंगलादेशले मलेसियालाई १ सय १७ रनको मध्यम लक्ष्य दिएको छ ।

झेजिङमा टस जितेर पहिला ब्याटिङ रोजेको बंगलादेशले निर्धारित २० ओभरमा ५ विकेट गुमाउँदै १ सय १६ रन बनायो । बंगलादेशका सैफ हसनले ५२ बलमा १ चौका र ३ छक्कासहित ५० रनको अविजित कप्तानी इनिङ खेले । अफिफ हुसैन १४ बलमा २ चौका र २ छक्कासहित २३ रन बनाए ।

शाहादात हुसैन २६ बलमा ३ चौकासहित २१ रनमा आउट भए । जकेर अली १४ बलमा १४ रनमा अविजित रहे । बंगलादेशले एक रन जोड्दा दुई खेलाडी गुमाएको थियो । बंगलादेश २.५ ओभरमा ३-३ को दयनीय अवस्थामा पुगेको थियो । त्यस्तै ४१-४ हुँदै खेलमा पूनरागमन गरेको थियो ।

मलेसियाका पवनदीप सिंले ४ ओभरमा १ मेडनसहित १२ रन खर्चेर २ विकेट लिए । विजय उन्नीले ४ ओभरमा ४६ रन खर्चेर १ विकेट लिए । विरनदीप सिंहले ४ ओभरमा १३ रन खर्चेका थिए । अनवार रहमानले ४ ओभरमा २३ रन खर्चेर १ विकेट लिए ।

त्यस्तै मोहम्मद अमिरले ४ ओभरमा २२ रन खर्चिए । पहिलो क्वाटरफाइनलमा भारतले नेपाललाई हराउँदै सेमिफाइनलमा स्थान बनाएको थियो । त्यस्तै दोस्रोे क्वाटरफाइनलमा पाकिस्तानले हङकङलाई हराएको थियो । तेस्रो क्वाटरफाइनलमा अफगानिस्तानले श्रीलंकालाई हराएको थियो ।