एजेन्सी – विश्वकप कुनैपनि युवा खेलाडीलाई स्टार बन्ने सबैभन्दा ठूलो अवसर हो । विशेषगरि एसोसिएट टोलीका खेलाडीको मुख्य सपना विश्वकप खेल्ने हुन्छ । टेस्ट टोलीका युवा खेलाडीको सपना आफ्नो देशलाई विश्वकप जिताउने हुन्छ ।

बिहीबार देखी भारतमा विश्वकप सुरु हुँदैछ । उक्त विश्वकपमा आशा गरिएका थुप्रै युवा स्टारहरु खेल्दैछन् । पहिलो पटक एकदिवसीय विश्वकप खेल्दै सानदार प्रदर्शन गर्न सक्ने पाँच युवा खेलाडी यस प्रकार छन् ।

५.जेराल्ड कोट्जी (दक्षिण अफ्रिका)

दक्षिण अफ्रिका तीव्र गतिका बलरको उर्भर भूमि मानिन्छ । यस विश्वकपमा पनि दक्षिण अफ्रिकाले तीव्र गतिको बलिङ आक्रामणलाई मुख्य हतियार बनाएको छ । २३ वर्षीय युवा तीव्र गतिका बलर जेराल्ड कोट्जीले डेब्यू विश्वकप खेल्दैछन् ।

उनी गती र बाउन्सका लागि चिनिन्छन् । आक्रामक स्वभावका कोट्जीले ६ ओडिआईमा ११ विकेट लिएका छन् । दक्षिण अफ्रिका भविष्य मानिएका उनले आफ्नो गती र बाउन्सका साथ विश्वकपमा सानदार प्रदर्शन गर्न सक्छन् । तीव्र गतिका बलर एनरिच नोर्किया टोलीमा नहुँदा उनले नियमित खेल्ने सम्भावना पनि देखिन्छ ।

४. रचिन रविन्द्र (न्युजिल्यान्ड)

न्युजिल्यान्डका युवा अलराउन्डर रचिन रविन्द्रले पनि विश्वकपमा डेब्यू गर्दैछन् । छोटो समयमै उनले न्युजिल्यान्डको टोलीबाट राम्रो प्रभाव छाडेका छन् । रचिन ओपनिङ देखी तल्लोक्रम कुनैपनि भूमिकामा ब्याटिङ गर्न सक्छन् । स्पिन पनि त्यतिनै राम्रो खेल्न सक्छन् ।

२३ वर्षीय उनले १२ ओडिआई खेलमा १ अर्धशतकसहित कुल १ सय ८९ रन बनाउनुको साथै १२ विकेट लिएका छन् । वार्मअप खेलमा उनले पाकिस्तानविरुद्ध ७२ बलमा १६ चौका र १ छक्कासहित ९७ रन बनाएका थिए ।

केन विलियम्सनको कप्तानीमा खेल्ने हुँदा उनले झन् राम्रो प्रदर्शन गर्नसक्छन् । विलियम्सनले युवा खेलाडीको क्षमता अनुसार भूमिका पनि दिने गर्दछन् ।

३.दुनिथ वेलालागे ( श्रीलंका)

श्रीलंकाका २० वर्षीय युवा स्पिन अलराउन्डर दुनिथ वेलालागेले पनि डेब्यू विश्वकपमा सानदार प्रदर्शन गर्न सक्छन् । उनी उत्कृष्ट स्पिनसँगै तल्लोक्रममा राम्रो ब्याटिङ गर्ने गर्दछन् । वानिन्दु हसरंगा चोटका कारण टोलीमा नहुँदा उनी नियमित खेल्न पाउनेछन् ।

अघिल्लो महिना श्रीलंकालाई एसिया कपको फाइनलसम्म पुर्याउन दुनिथले सानदार अलराउन्ड प्रदर्शन गरेका थिए ।
सुपर फोरमा भारतविरुद्ध पाँच विकेट लिनुको साथै ४० रन बनाउँदै उनी प्लेयर अफ द म्याच चुनिएका थिए । उनले लिएका विकेटमा रोहित शर्मा, शुभमन गिल, विराट कोहली, लोकेश राहुल र हार्दिक पान्ड्याको थियो ।

त्यसैको कारण हारको बाबजुद उनी प्लेयर अफ द म्याच चुनिएका थिए । भारतीय कन्डिसन पनि स्पिन सहयोगी छ । डेब्यू विश्वकपमा उनले सानदार प्रदर्शन गर्न सक्छन् ।

२.क्यामरन ग्रीन (अष्ट्रेलिया)

अष्ट्रेलिया युवा अलराउन्डर क्यामरन ग्रीन विश्वफोटक ब्याटिङका लागि चिनिन्छन् । तीव्र गतिमा बलिङ पनि गर्ने गर्दछन् । पछिल्लो दुई वर्षमा अष्ट्रेलियाबाट उनले नियमित खेल्दै आएका छन् ।

ओडिआई, टि२० आई र टेस्ट तीनै संरचनामा ग्रीनको प्रदर्शन सानदार छ । त्यसैको कारण गत आइपिएल अक्सनमा मुम्बई इन्डियन्सले उनलाई १७ करोड ५० लाख भारु अक्सनमा खर्चिएको थियो ।

२४ वर्षीय ग्रीनले अष्ट्रेलियाबाट २० ओडिआईमा ३ सय ७९ रन बनाउनुको साथै १६ विकेट लिई सकेका छन् । भारतीय कन्डिसन बारे उनलाई राम्रोसँग थाहा छ ।

उनले आइपिएलमा मुम्बईबाट सनराइज हैदराबादविरुद्ध ४७ बलमा समान ८ चौका र छक्काका साथ शतक पूरा गरेका थिए । विश्वकप दाबेदार अष्ट्रेलियाबाट उनले सानदार प्रदर्शन गर्ने अनुमान गरिएको छ ।

१.बास डि लिड (नेदरल्यान्ड्स)

नेदरल्यान्ड्सले विश्वकपमा पनि ठूला टोलीलाई सरप्राइज दिने सम्भावना छ । गत जुलाईमा विश्वकप छनोटमा वेस्टइन्डिज, जिम्बावे र आयरल्यान्ड जस्ता टेस्ट टोलीलाई पछि पार्दै नेदरल्यान्ड्सलाई विश्वकपमा पुर्याउन लिड हिरो बनेका थिए ।

अलराउन्डर बास डि लिड नेदरल्यान्ड्सका प्रमुख हतियार हुन् । उनले तीव्र गतिमा बलिङसँगै मध्यक्रममा उत्कृष्ट ब्याटिङ गर्ने गर्दछन् ।

२३ वर्षीय लिडले नेदरल्यान्ड्सबाट ३० ओडिआईमा १ शतक, दुई अर्धशतकसहित कुल ७ सय ६५ रन बनाउनुको साथै २४ विकेट लिएका छन् । विश्वकपमा पुग्न निर्णायक खेलमा स्कटल्यान्डले २ सय ७८ रनको लक्ष्य दिएको थियो । उक्त लक्ष्य नेदरल्यान्ड्सले ४४ ओभरमा पूरा गर्नुपर्ने थियो ।

लिडले ९२ बलमा ७ चौका र ५ छक्कासहित १ सय २३ रनको सानदार शतकीय इनिङका साथ उनले ४२.५ ओभरमै खेल पूरा गर्दै विश्वकपमा पुर्याएका थिए । स्कटल्यान्डलाई मध्यम योगफलमै रोक्न उनले पाँच विकेट लिएका थिए ।

लिड एसोसिएट क्रिकेटका युवा स्टार हुन् । धुरमबाट लगातार काउन्टी खेल्ने हुँदा उनको मनोबल झनै उच्च छ । विश्वकपमा पनि उनले सानदार प्रदर्शन गर्न सक्ने अनुमान गरिएको छ ।