एजेन्सी – न्युजिल्यान्डका युवा अलराउन्डर रचिन रविन्द्र विश्वकप डेब्यू खेलमै प्लेयर अफ द म्याच चुनिएका छन् । आइसिसी विश्वकप २०२३ को पहिलो खेलमा साविक विजेता इंल्यान्डलाई ९ विकेटले हराउन सानदार शतक हानेका रविन्द्र प्लेयर अफ द म्याच चुनिएका हुन् ।

जितको लागि २ सय ८३ रनको विजयी लक्ष्य पछ्याएको न्युजिल्यान्डले ३६.२ ओभरमा पूरा गरेको थियो । दोस्रो ओभरको पहिलो बलमा ओपनर विल योंग साम करनको बलमा क्याच आउट भएपछि रविन्द्र मैदान छिरेका थिए ।

उनी खेल सकाएर मैदान फर्किका छन् । रविन्द्रले ९६ बलमा ११ चौका र ५ छक्कासहित १ सय २३ रनको सानदार शतकीय इनिङ खेले । उनको यो अन्तर्राष्ट्रिय करिअरको पहिलो शतक हो । उनले दोस्रो विकेटका लागि ओपनर डेभन कन्वेसँग २ सय ७३ रनको अविजित दोहोरो शतकीय साझेदारी गरेका थिए ।

कन्वे १ सय २१ बलमा १९ चौका र ३ छक्कासहित १ सय ५२ रनमा अविजित रहे । केन विलियम्सन, लोकी फर्गुसन र टिम साउथी बिनानै खेलेको न्युजिल्यान्डले सानदार प्रदर्शन गर्यो ।

रचिन रविन्द्रले बलिङमा १० ओभरमा ७६ रन खर्चेर १ विकेट लिएका थिए । उनले १६ बलमा ४ चौका र १ छक्कासहित २५ रन बनाएका ह्यारी ब्रुकलाई कन्वेबाट क्याच आउट गराएका थिए ।

२३ वर्षीय रविन्द्रले सिनियर टोलीबाट पहिलो पटक विश्वकप खेल खेलेका हुन् । उनले ओडिआईमा गत मार्चमा श्रीलंकाविरुद्ध डेब्यू गरेका थिए ।