एजेन्सी – भारतीय युवा ओपनर शुभमन गिललाई डेंगी संक्रमण पोजेटिभ देखिएपछि आईसिसी विश्वकप २०२३ मा आइतबार अष्ट्रेलियाविरुद्ध खेल गुमाउने निश्चित भएको छ ।

डेंगी देखिएपछि गिल बुधबार र बिहीबार एमए चिदाम्बरम स्टेडियममा अभ्यासमा समेत आएका थिएनन् । घरेलु टोली भारतले आइतबार चेन्नईमा उपाधिको प्रमुख दाबेदार अष्ट्रेलियासँग खेल्दैछ ।

गिल अनुपस्थीत हुँदा भारतलाई ठूलो धक्का लाग्ने देखिन्छ । गिलले २०२३ मा अन्तर्राष्ट्रिय क्रिकेटमा सानदार प्रदर्शन गर्दै आएका छन् ।

गिल २०२३ ओडिआईमा सर्वाधिक रन बनाउने ब्याटर हुन् । उनले २०२३ ओडिआईमा २० खेलमा ५ शतक र ५ अर्धशतकसहित कुल १२ सय ३० रन बनाएका छन् ।

गत जुनमा हैदराबादमा गिलले न्युजिल्यान्डविरुद्ध २ सय ८ रनको दोहोरो शतक प्रहार गरेका थिए । केहि साता अघि मात्रै उनले ७४ र १ सय ४ रन बनाएका थिए ।

गिल नहुँदा कप्तान रोहित शर्मासँग ईशान किशनले भारतको ओपनिङ गर्नेछन् । ईशानले पनि भारतीय टोलीबाट राम्रो खेल्दै आएका छन् ।

ईशानले गत डिसेम्बरमा बंगलादेशविरुद्ध २ सय १० रनको दोहोरो शतकीय इनिङ खेलेका थिए । गिलले ओपनिङ गर्दा ईशानले तल्लोक्रममा खेल्दै आएका छन् । तर गिल नहुँदा उनी ओपनिङ गर्नेछन् ।