काठमाडौं (हाम्रो खेलकुद) – तीव्र गतिका बलिङ अलराउन्डर सोमपाल कामीले नेपाल भारत भन्दा एक दुई स्टेपमात्रै तल भएको बताएका छन् । चीनमा सम्पन्न १९ औं एसियाली खेलकुद (एसियाड) खेलेर स्वदेश फर्किएपछि सोमपालले उक्त प्रतिक्रिया दिएका हुन् ।

‘एकदमै राम्रो अनुभव रह्यो । नतिजा हाम्रो पक्षमा आएन । दिप्पी, कुशल मल्ल र जोराले एकदमै राम्रो खेल्यो । विशेष गरी अभिनाश बोहराले कमब्यायक गर्यो । त्यो हाम्रो लागि खुसीको कुरा थियो । दीपेन्द्रले ९ बलमा ५० बनायो । मल्लले ब्याटिङ गर्यो त्यो फरक थियो हाम्रो लागी’, सोमपालले एसियाड अनुभव भने ।

विकेट सहज नभएको सोमपाल बताउँछन् । ‘त्यो विकेट सहज थिएन । हाम्रो ब्याटरले एकदमै राम्रो खेल्यो । अभिनाशले बलिङ राम्रो गर्यो । भारतसँग १ सय ८० सम्म रोक्न सके यो मैदानमा पूरा गर्न सक्छौं भन्नेमा हामी स्पष्ट थियौं । १०/२० रन बढी बन्यो । त्यसले गर्दा नतिजा हाम्रो पक्षमा आएन’, सोमपालले भने ।

त्यसैमा उनले थपे, ‘गलत समयमा पनि हाम्रो विकेट गुम्यो । पक्कैपनि एकदमै अनुभवी खेलाडी थिए । उनीहरु डे क्रिकेट खेल्छ । उनीहरुको स्पिनरमा रन बनाउन सकिएन । उनीहरुको स्पिनरहरुले एकदमै राम्रो गरे । हामी स्पिनरलाई धेरै राम्रो खेल्छौं । तर त्यो विकेटमा गएर खेल्न सकिएन ।’

पहिला ब्याटिङ थालेको भारतले निर्धारित २० ओभरमा ४ विकेट गुमाउँदै २ सय २ रन बनाएको थियो । यशस्वी जैसवालले १ सय रनको शतकीय इनिङ खेलेका थिए । उक्त विजयी लक्ष्य पछ्याएको नेपालले २० ओभरमा ९ विकेट गुमाउँदै १ सय ७९ रन बनाएको थियो ।

नेपालका दीपेन्द्रसिंह ऐरीले ३२, कुशल मल्ल २९, कुशल भुर्तेल २८ र सन्दीप जोरा २९ रनमा आउट भएका थिए । नेपाल २३ रनले पराजित हुँदै क्वाटरफाइनलबाट बाहिरिएको थियो । एक महिना अघि नेपालले एसिया कप खेल्दै भारतसँग १० विकेटले पराजित भएको थियो ।

सोमपाल नेपाल भारत भन्दा एक दुई स्टेप मात्रै तल भएको बताउँछन् । यदि भारतसँग पाँच खेल खेलेको खण्डमा तीन खेलमा हराउन सक्ने दाबी पनि गर्दछन् ।

‘एसिया कप र एसियाडमा भारतसँग खेल्दा मलाई के अनुभव हुन्छ भने हामी भारत भन्दा एक दुई स्टेप मात्रै तल हौं । यस्तै खेल खेलि राखौं भने । राम्रो टोलीसँग खेल्यौं भने । भारतको यो टिमसँग पाँच खेल खेलेको भए टक्कर दिन्थौं होला । तीन खेल जित्न पनि सक्थ्यौं । ट्रफी हाम्रो पक्षमा आउन सक्थ्यो । आशा गरौं यस्तो प्रतियोगिता अझै हुन्’, उनले भने ।

सोमपाल टोलीले हरेक खेलमा सिकी राखेको बताउँछन् । ‘जहाँ हामी भारत, रणजी टोली टोलीसँग खेल्न पायौं भने भविष्यमा धेरै राम्रो नतिजा आउँछ, सिकी राखेका छौं । हरेक दिन कहि न कहि सुधार भएको थियो । ग्राउन्ड सानो भएपनि रन बनाउन एकदमै गाह्रो थियो । हाम्रो ब्याटरले धेरै राम्रो गरे । त्यो मुलपानी भन्दा पनि कठिन विकेट थियो ।’

सोमपाल एसियाडमा गोल्ड जित्न नसकेपनि एक महिनापछि घरेलु मैदानमा हुने टि२० क्वालिफायर जित्दै विश्वकपमा पुगेर खुसी दिने बताउँछन् ।

‘हामी हरेक दिन मेडल चेक गर्दा हाम्रो नाम नै थिएन । हरेक दिन खाना र नास्ता गर्न जादा कसले कति मेडल जित्यो भन्दा हाम्रो नाम नै थिएन । हामी नेपाललाई गोल्ड लगेर जान्छौं । हामीले गोल्ड नै सोचेका थियौं । हाम्रो प्रयास पनि त्यहिँ थियो । कहि न काहिँ १०/२० रन बढी बन्दा हाम्रो हातमा नतिजा ल्याउन सकिएन । मलाई आशा छ कि विश्वकप खेलेर नेपाललाई स्वर्ण दिनेछौं ।’