एजेन्सी – विश्व कप क्रिकेटमा न्युजिल्यान्डले नेदरल्यान्ड्सविरुद्ध ठूलो स्कोर बनाएको छ । टस हारेर पहिले ब्याटिङको पाएको मौकालाई पूरा सदुपयोग गर्ने क्रममा न्युजिल्यान्डले ३ खेलाडीको अर्धशतकको मद्दतमा ५० ओभरमाा ७ विकेट गुमाएर ३ सय २२ रन बनाएको छ ।

ओपनर विल योङ, रचिन रविन्द्र र टोम लाथमले अर्धशतक पूरा गरेका थिए । अर्का ओपनर डेभोन कनवेसँग योङले पहिलो विकेटका लागि ६७ रन जोडेका थिए । कनवे ३२ रनमा आउट भएका थिए । योङले भान मेक्रेनको बलमा आउट हुनुअघि ८० बलमा ७ चौका र २ छक्काको मद्दतमा ७० रन बनाएका थिए ।

योङले दोस्रो विकेटका लागि रविन्द्रसँग ७७ रनको साझेदारी गरेका थिए । इङ्ल्यान्डविरुद्धको खेलमा शतक प्रहार गरेका रविन्द्रले भान डेर मेर्वेको बलमा आउट हुनुअघि ५१ बलमा ५१ रननै बनाएका थिए । उनले ३ चौका र १ छक्का प्रहार गरे । ४८ रन बनाएका डेरी मिचेल भान मिकिरेनको शिकार भए ।

आर्यन दत्तको बलमा आउट भएका लाथमले ४६ बलमा ६ चौका र १ छक्काासहित ५३ रन बनाए । मिचेल सान्टनेर अविजित ३६ र म्याट हेन्री अविजित १० रनमा रहे । नेदरल्यान्ड्का लागि दत्त, मिकिरेन र डेर मेर्वेले समान २ विकेट र बास डे लिडेले १ विकेट लिए । नेदरल्यान्ड्ले पहिलो खेलमा हार बेहोरेको थियो ।