एजेन्सी – आइसिसी विश्वकप २०२३ मा आज दक्षिण अफ्रिका र अष्ट्रेलियाबीच प्रतिस्पर्धा हुँदैछ । खेल नेपाली समय अनुसार दिउँसो २ : १५ मा लखनऊमा सुरु हुनेछ । दक्षिण अफ्रिकाले पहिलो खेलमा श्रीलंकालाई १ सय २ रनले हराएको थियो ।

अष्ट्रेलिया पहिलो खेलमा घरेलु टोली भारतसँग ६ विकेटले पराजित भएको थियो । दक्षिण अफ्रिकाले तीन शतकका साथ श्रीलंकाविरुद्ध ४ सय २८ रन बनाएको थियो । विश्वकपमा पहिलो पटक एकै इनिङमा तीन शतक हान्नुको साथै सर्वाधिक ठूलो योगफल बनाएको थियो ।

उक्त खेलमा क्विन्टन डि कक १ सय, रास्सी भान डर डुसेन १ सय ८ र एडेन माक्ररम १ सय ६ रनमा आउट भएका थिए । माक्ररमले विश्वकप इतिहासकै सर्वाधिक छिटो ४९ बलमा शतक हानेका थिए ।

दक्षिण अफ्रिका ब्याटिङ लाइनप उत्कृष्ट छ । हेनरिक क्लासेन र डेविड मिलर जस्ता विष्फोटक ब्याटर तल्लोक्रममा छन् । कप्तान टेम्बा बभुमाबाट राम्रो प्रदर्शन चाहन्छ । तर दक्षिण अफ्रिका ब्याटिङको असली परिक्षा भने अष्ट्रेलिया बलरसँग हुनेछ ।

अष्ट्रेलियासँग प्याट कमिन्स, जोश हेजलवुड र मिचेल स्टार्क जस्ता तीन विश्वस्तरिय बलर छन् । भारतलाई सुरुवातमा अष्ट्रेलियाले ३–२ को दयनीय अवस्थामा पुर्याएको थियो । तर १ सय ९९ रन मात्रै बनाएको हुँदा त्यो जितको लागि पर्याप्त थिएन ।

अष्ट्रेलिया विश्वस्तरिय बलिङ आक्रामण सामु दक्षिण अफ्रिका उत्कृष्ट ब्याटिङक्रम खेलमा हेर्न लायक हुनेछ । अष्ट्रेलिया ब्याटिङ उत्कृष्ट छ । स्टिभ स्मिथ, मार्नस लाबुसेन, डेविड वार्नर र मिचेल मार्श जस्ता ब्याटर छन् ।

यी चार मध्य एकले ठूलो इनिङ खेल्नुपर्ने हुन्छ । एलेक्स केरी, क्यामरन ग्रीन र ग्लेन म्याक्सवेलले तल्लोक्रम सम्हाल्नुपर्ने हुन्छ । एडम जाम्पाको लय पछिल्लो समय त्यति राम्रो छैन ।

प्रमुख स्पिनर जाम्पाबाट टोली उच्च प्रदर्शनको अपेक्षा राख्नेछ । विश्वकपमा यी दुई देशबीच ६ खेलमा भएको छ । दक्षिण अफ्रिका २ खेलमा जित, ३ खेलमा पराजित र १ खेल टाई भएको थियो ।