एजेन्सी – कप्तान केन विलियम्सनको पूनरागमनसँगै न्युजिल्यान्डले आइसिसी विश्वकप २०२३ मा बंगलादेशमाथि ८ विकेटको सहज जित हात पारेको छ । लगातार तेस्रो जितका साथ न्युजिल्यान्ड अंक तालिकामा शीर्षस्थानमा उक्लिएको छ ।

जितको लागि २ सय ४६ रनको विजयी लक्ष्य पछ्याएको न्युजिल्यान्डले ४२.५ ओभरमा २ विकेट गुमाउँदै पूरा गर्यो । न्युजिल्यान्डको जितमा डर्याल मिचेल ६७ बलमा ६ चौका र ४ छक्कासहित ८९ रनमा नट आउट रहे । कप्तान केन विलियम्सन १ सय ७ बलमा ८ चौका र १ छक्कासहित ७८ रनमा रिटायर्ड आउट भए ।

विलियम्सन ६ महिनापछि पहिलो पटक टोलीमा फर्किएका हुन् । गत मार्चमा आइपिएल खेल्नेक्रममा उनी घाइते भएपछि लामो समय मैदान बाहिर रहनु परेको थियो । शल्यक्रियापछि फर्किएका विलियम्सनले उत्कृष्ट पूनरागमन गरेका हुन् ।

ओपनर रचिन रविन्द्र ९ रनमै आउट भएका थिए । दोस्रो विकेटका लागि डेभन कन्वे र विलियम्सनले ८० रनको साझेदारी गरे । कन्वे ५९ बलमा ३ चौकासहित ४५ रनमा सकिब अल हसनको बलमा एलबीडब्लू आउट भए । तेस्रो विकेटका लागि डर्याल मिचेल र विलियम्सनले १ सय ८ रनको शतकीय साझेदारी गर्दै सहज जितको आधार बनाएका थिए ।

ग्लेन फिलिप्स ११ बलमा १ चौका र १ छक्कासहित १६ रनमा नटआउट रहे । बंगलादेशका सकिब अल हसन र मुश्ताफिजुर रहमानले एक एक विकेट लिए ।

त्यसअघि चेन्नईमा टस हारेर पहिला ब्याटिङको निम्तो पाएको बंगलादेशले निर्धारित ५० ओभरमा ९ विकेट गुमाउँदै २ सय ४५ रन बनाएको थियो । बंगलादेशका मुश्फिकुर रहिमले ७५ बलमा ६ चौका र २ छक्कासहित सर्वाधिक ६६ रन बनाएपनि त्यो जितको लागि पर्याप्त थिएन । त्यस्तै कप्तान सकिब अल हसनले ५१ बलमा ३ चौका र २ छक्कासहित ४० रनमा आउट भए । महमूदुल्लाह रियाद ४९ बलमा २ चौका र २ छक्कासहित ४१ रनमा नट आउट रहे ।

न्युजिल्यान्डको उत्कृष्ट तीव्र गतिको बलिङ आक्रामण सामु कुनैपनि बंगलादेशी ब्याटरले ठूलो इनिङ खेल्न सकेनन् । ओपनर तथा प्रमुख ब्याटर लिटन दास इनिङको पहिलो बलमै क्याच आउट भएका थिए । बोल्टको बलमा उनी म्याट हेनरीबाट क्याच आउट भएका थिए । तानजिद हसन १६, मेहेदी हसन मिराज ३०, नाज्मुल हसन सान्टो ७, तौहिद हृदोय १३ र तस्किन अहमद १७ रनमा आउट भए ।

न्युजिल्यान्डको जितमा लोकी फर्गुसनले १० ओभरमा ४९ रन खर्चेर ३ विकेट लिए । ट्रेन्ट बोल्टले १० ओभरमा ४५ रन खर्चेर २ विकेट लिए । म्याट हेनरी १० ओभरमा ५८ रन खर्चेर २ विकेट लिए । ग्लेन फिलिप्स र मिचेल सान्टनारले एक एक विकेट लिए ।

न्युजिल्यान्ड ३ खेलमा ६ अंकका साथ शीर्षस्थानमा छ । न्युजिल्यान्डले पहिलो खेलमा इंग्ल्यान्डलाई ९ विकेट र नेदरल्यान्ड्सलाई ९९ रनले हराएको थियो । अव १८ अक्टोबरमा अफगानिस्तानसँग खेल्नेछ । बंगलादेशको यो दोस्रो हार हो । बंगलादेशले पहिलो खेलमा अफगानिस्तानलाई ६ विकेटले हराएको थियो । इंग्ल्यान्डसँग १ सय ३७ रनले पराजित भएको थियो । बंगलादेशले १९ अक्टोबरमा भारतसँग खेल्नेछ ।

१० टोली सहभागी प्रतियोगिता सिंगल राउन्ड रोविनको आधारमा हुनेछ । शीर्ष चार टोली सेमिफाइनल खेल्नेछ । दक्षिण अफ्रिका २ खेलमा ४ अंकका साथ दोस्रो स्थानमा छ । समान दुई खेलमा ४-४ अंक भएपनि भारत तेस्रो र पाकिस्तान चौथो स्थानमा छन् । शनिबार भारत र पाकिस्तानबीच प्रतिस्पर्धा हुनेछ ।