एजेन्सी – स्पिनर कुलदीप यादवले एकै ओभरमा दुई विकेट लिएपछि भारत आइसिसी विश्वकप २०२३ मा पाकिस्तानविरुद्ध खेलमा फर्किएको छ । नरेन्द्र मोदी स्टेडियम अहमदाबादमा टस हारेर पहिला ब्याटिङको निम्तो पाएको पाकिस्तानले ३३ ओभरमा ५ विकेट गुमाउँदै १ सय ६६ रन बनाएको छ ।

मोहम्मद रिजवान ६४ बलमा ७ चौकासहित ४८ रनमा क्रिजमा छन् । बाबर ५८ बलमा ७ चौकासहित ५० रनमा आउट भए । बाबरले ५७ बलमा अर्धशतक पूरा गरेका थिए । पाकिस्तानलाई ओपनर इमाम उल हक र अब्दूल्लाह शफिकले ८ ओभरमा ४१ रन जोड्दै राम्रो सुरुवात दिलाएका थिए ।

श्रीलंकाविरुद्धका धतकधारी शफिक भारतविरुद्ध २४ बलमा ३ चौकासहित २० रनमा आउट भए । उनी मोहम्मद शिराजको बलमा एलबीडब्लू आउट भए ।

हक ३८ बलमा ६ चौकासहित ३६ रनमा आउट भए । उनी हार्दिक पान्ड्याको बलमा एज लागेर विकेटकिपर लोकेश राहुलबाट क्याच आउट भए ।

त्यो समय पाकिस्तान १२.३ ओभरमा ७३-२ को अवस्थामा थियो । त्यसपछि मोहम्मद रिजवान र बाबर आजमले १ सय ३ बलमा ८२ रनको महत्वपूर्ण साझेदारी गरेका थिए । शिराजको ३० औं ओभरको चौथो बलमा बाबर बोल्ड आउट हुन पुगेका थिए ।
साउद शकिल कुलदीप यादवको ३३ औं ओभरको दोस्रो बलमा ६ रनमा एलबीडब्लू आउट भए ।

भारतले रिभ्यु लिँदै उनलाई आउट गरेको थियो । यसै ओभरको अन्तिम बलमा इफ्तिखार अहमद ४ रनमा बोल्ड आउट भए । एकै ओभरमा दुई विकेट गुमाएपछि पाकिस्तान खेलमा केहि दबाबमा परेको छ ।