काठमाडौं (हाम्रो खेलकुद) – नेपालले त्रिकोणात्मक टि२० आई सिरिज अन्तर्गत पहिलो खेल बुधबार मुलपानी क्रिकेट मैदानमा खेल्नेछ । मुलपानीमा नेपाल र युएईबीचको खेल दिउँसो १ बजे सुरु हुनेछ । नेपाल र युएईबीचको खेलसँगै माथिल्लो मुलपानी क्रिकेट मैदान टि२० आई मान्यता पाउने विश्वकै १ सय ९० औं मैदान बन्नेछ ।

नेपालको माथिल्लो मुलपानी टि२० आई मान्यता पाउने दोस्रो मैदान बन्नेछ । २०१९ डिसेम्बरमा टियु क्रिकेट मैदान टि२० आई मान्यता पाउने विश्वको १ सय ३९ औं मैदान बनेको थियो ।

गत वैशाखमा सम्पन्न एसिसी प्रिमियर कपमा माथिल्लो मुलपानी क्रिकेट मैदानले ओडिआई मान्यता पाएको थियो । सेमिफाइनल खेलमा युएई र ओमानबीचको खेलबाट मुलपानी ओडिआई मान्यता पाउने विश्वको २ सय १६ औं मैदान बनेको थियो ।

२०२० मा टियु क्रिकेट मैदान ओडिआई मान्यता पाउने विश्वको २ सय ९ औं मैदान बनेको थियो । विश्वमा सर्वाधिक धेरै टि२० आई मैदान भारतमा छन् । भारतमा २४, अष्ट्रेलिया १२, इंग्ल्यान्ड १०, दक्षिण अफ्रिका १२ र न्युजिल्यान्ड १० मैदान छन् ।

नेपालले कार्तिक २ (अक्टोबर १९) मा हङकङसँग खेल्नेछ । नेपालले कार्तिक ४ (अक्टोबर २१) मा हङकङसँग खेल्नेछ । कार्तिक ६(अक्टोबर २३) मा नेपालले युएईसँग खेल्नेछ । राउन्ड रोबिनका सबै खेल मुलपानी मैदानमा हुनेछन् । पहिलो खेल दिउँसो १ बजे हुँदा अन्य खेल विहान ११ बजे सुरु हुनेछ ।

शीर्ष दुई टोली फाइनलमा पुग्नेछन् । फाइनल भने कार्तिक १० (अक्टोबर २७) मा टियु क्रिकेट मैदानमा हुनेछ । नेपालले आइसिसी विश्वकप टि२० एसिया क्षेत्र छनोट अघि उक्त सिरिज आयोजना गरेको हो ।