काठमाडौं (हाम्रो खेलकुद) – नेपाल यू-१९ पुरुष राष्ट्रिय टोलीले एसिसी यू-१९ प्रिमियर कपको सेमिफाइनल खेलमा जापानसँग भिड्दैछ । पछिल्लो खेलबाट नेपालले टोलीमा एक परिवर्तन गरेको छ ।

टस हारेर पहिला ब्याटिङको निम्तो पाएको नेपालले आजको खेलमा हेमन्त धामीलाई टोलीमा समेटेको छ । मलेसियाको बायोमास ओभलमा जापानका कप्तान कोजी हार्डग्रेभ एबीले टस जितेर पहिला फिल्डिङ गर्ने निर्णय लिएका थिए । नेपालले तीव्र गतिका बलर दुर्गेश गुप्ताको स्थानमा हेमन्तलाई टोलीमा राखेको हो ।

नेपालका लागि ओपनरमा दीपक बोहोरा र अर्जुन कुमाल नै रहेका छन् । त्यसपछि आकाश त्रिपाठी, देव खनाल, दीपक डुम्रे र विशाल विक्रम केसीले मध्यक्रम सम्हाल्नेछन् । मिलन बोहोरासँगै बलरमा दीपेश कँडेल पनि ब्याटिङको क्षमता राख्छन् । सुभाष भण्डारी, आकाश चन्द र हेमन्त धामी बलरको भूमिकामा छन् ।

नेपाल समूह ए र जापना समूह डी को विजेताको रुपमा सेमिफाइनल खेल्न लागेका हुन् । अर्को सेमिफाइनलमा यूएई र सिंगापुर भिड्दैछन् । जापानले हङकङलाई डकवर्थ लेविस पद्धतिको आधारमा ५७ रनले हराउँदै नेपालसँगको भेट पक्का गरेको हो । हङकङविरुद्ध जापानले ५० ओभरमा ९ विकेट गुमाउँदै २ सय ३८ रन बनाएको थियो ।

ओपनर आदित्य फड्केले ७९, निखिल पोलले ३३, ऋथिक सिभकुमारले ४४ रन बनाएका थिए । जापानले इन्डोनएसियालाई ३० रनमै अल आउट गरेको थियो । इन्डोनएसियालाई सस्तैमा अल आउट गर्न जापानका कजुमा काटो स्टाफोर्ड र चार्ली हिन्जले समान चार विकेट लिएका थिए ।

जापानले मलेसियालाई डकवर्थ लेविस पद्धतिको आधारमा ६ रनले हराएको थियो । जापानका ओपनर आदित्य र निखिल राम्रो सम्भावना बोकेका ब्याटर हुन् । बलिङमा कजुमा र चार्ली प्रमुख बलिङ हतियार हुन् ।

नेपालले इरानलाई २ सय ७४ रन, बहराइनलाई ७ विकेट र साउदी अरेवियालाई ३ सय १ रनले हराएको थियो ।

फाइनल मंगलबार हुनेछ । फाइनल पुग्ने दुई र तेस्रो स्थानमा रहने एक गरी तीन टोली आगमी डिसेम्बरमा हुने एसिया कप खेल्न पाउनेछन् । तेस्रो स्थानको लागि सेमिफाइनलमा पराजित हुने टोली भिड्नेछन् ।