एजेन्सी – कमजोर सुरुवातबाट पुनरागमन गर्दै नेदरल्यान्ड्सले जारी क्रिकेट विश्वकपमा श्रीलंकासामु २ सय ६३ रनको लक्ष्य प्रस्तुत गरेको छ ।

नेदरल्याण्ड्सले ७१ रनमा पाँच विकेट गुमाएको अवस्थाबाट उकास्दै ४९.४ ओभरमा अलआउट हुँदै २सय ६२ रन बनाएको हो । डच टोलीका लागि साइब्राण्ड एँगलब्रेक्तले सर्वाधिक ७० रन बनाए । ८२ बल खेलेका उनले चार चौका र एक छक्का प्रहार गरेका थिए । एँगलब्रेक्तले छैटौं विकेटका लागि लोगान भ्यान विक सँग मिलेर १३० रनको साझेदारी गरेका थिए ।

भ्यान विकले ७५ बलमा ५९ रन बनाउँदा एक चौका र एक छक्का प्रहार गरेका थिए । ओपनर ब्याटर विक्रमजित सिंह चार रनमा आउट हुँदा अर्का ओपनर म्याक्स ओडाउडले १६ रन बनाए । तीन नम्बरमा ब्याटिङ गर्न आएका कोलिन एकरमनले ३१ बलमा पाँच चौका सहित २९ रन बनाए ।

त्यसपछि आएका अल राउन्डर बास डे लेडाले छ रन मात्र बनाउँदा तेजा निदामनुरुले नौं रन बनाए । त्यस लगत्तै कप्तान स्कट एडवार्ड्सले १६ रन मात्र बनाउन सके । उनी पभिलियन फर्कंदा नेदरल्याण्ड्स ९१-६ को अवस्थामा थियो । सो अवस्थामा एँगलब्रेक्त र भ्यान विकले कमान सम्हालेका थिए ।

रुलफ भ्यान डर मर्वाले सात रन बनाउँदा ११ नम्बरका पल भ्यान मिकरनले चार रन बनाए । आर्यन दत्त नौं रणका नटआउट रहे। श्रीलंकाका लागि पेसरद्वय दिलशन मदुसान्का र कसुन रजिथाले समान चार-चार विकेट लिए । महिश थिकसनाले एक विकेट लिए ।

अहिलेसम्म विश्वकपमा खेलेको तीन खेलमा नेदरल्याण्ड्सले एक जित हासिल गरेको छ । सो जित दक्षिण अफ्रिका सँग रहेको थियो । श्रीलंका भने तीन खेलमा बिना अंकका साथ तालिकाको पुछारमा छ ।

विश्वकप अन्तर्गत मुम्बईमा भइरहेको दिनको दोस्रो खेलमा इंगल्याण्ड विरुद्ध टस हार्दै दक्षिण अफ्रिका पहिलो ब्याटिङ गर्दैछ ।