काठमाडौं (हाम्रो खेलकुद) – नेपालले एसिसी यू१९ प्रिमियर कपको फाइनल खेलमा युएईविरुद्ध सुरुवात दुई विकेट गुमाएको छ ।

बायोमास ओभलमा टस जितेर नेपालले पहिला ब्याटिङ गरेको नेपालले ९ ओभरमा २ विकेट गुमाउँदै ३१ रन बनाएको छ । अर्जुन कुमाल ३० बलमा ३ चौकासहित १६ र देब खनाल ९ बलमा ६ रन बनाउदै खेलेका छन् ।

ओपनर दिपक बोहरा १२ बलमा ५ रन बनाउदै अर्यांश शर्माबाट क्याच आउट भए । उनी हरित शेठ्ठीको बलमा आउट भएका थिए । कप्तान आयन खानले आकाश त्रिपाठीलाई शुन्यमा क्याच आउट गराए ।

नेपालले अलराउन्डर मिलन बोहराको स्थानमा विकेकिपर उत्तम थापामगरलाई आजको खेलमा मौका दिएको छ । उत्तम मध्यक्रममा स्पिन राम्रो खेल्ने गर्दछन् । त्यसैको कारण आज उनलाई मौका दिएको छ । नेपालले सेमिफाइनला जापानसँगको खेलबाट एक बाहेक अन्य परिवर्तन गरेको छैन ।

नेपालले सेमिफाइनल खेलमा जापानलाई डकवर्थ लेविस पद्धतिको आधारमा १ सय ४३ रन तथा युएईले दोस्रो सेमिफाइनल खेलमा सिंगापुरलाई डवकर्थ लेविस पद्धतिको आधारमा १० विकेटले हराउँदै फाइनलमा स्थान बनाएका हुन् ।

नेपालले गत फागनुमा आइसिसी यू१९ विश्वकप एसिया क्षेत्र छनोटमा युएइृलाई ७ रनले हराउँदै २०२४ को विश्वकपमा स्थान बनाएको थियो । नेपाल पुन युएईलाई हराउदै उपाधि जित्न चाहन्छ । युएई त्यसको बदला लिन खोज्नेछ । दुबै टोलीमा विश्वकप एसिष क्षेत्र छनोट खेल्दाका खेलाडी छन् ।

नेपालले समूह चरणमा इरानलाई २ सय ७४, बहराइनलाई ७ विकेट र साउदी अरेवियालाई ३ सय २ रनले हराएको थियो । उता युएईले समूह चरणमा चीनलाई ९ विकेट, ओमानलाई ३ विकेट, कतारलाई १० विकेटले हराएको थियो ।

नेपालको प्लेइङ ११ ः
दीपक बोहरा, अर्जुन कुमाल, आकाश त्रिपाठी, देव खनाल (कप्तान), दीपक प्रसाद डुम्रे, आकाश चन्द, दीपेक कँडेल, विशाल विक्रम केसी, सुवास भण्डारी, उत्तम थापामगर र हेमन्त धामी ।