एजेन्सी – ग्लेन म्याक्सवेलको कीर्तिमानी शतकको मद्दतले अष्ट्रेलियाले विश्वकप क्रिकेटमा नेदरल्याण्ड्स विरुद्ध विशाल योगफल खडा गरेको छ । अष्ट्रेलियाले निर्धारित ५० ओभरमा ८ विकट गुमाउँदै ३ सय ९९ रन बनाएको हो । अष्ट्रेलियाका ओपनर डेभिड वार्नरले पनि शतकीय पारी खेले ।

म्याक्सवेलले ४० बलमा शतक बनाउने क्रममा विश्वकप इतिहासको सबैभन्दा छिटो शतक बनाउने किर्तिमान तोडेका हुन् । उनले ४० बलमा शतक बनाउँदै यसै विश्वकपमा दक्षिण अफ्रिकाका एइडन मारक्रमले ४९ बलमा बनाएको शतकको कीर्तिमान तोडेका हुन् ।

टस जितेर ब्याटिङ गरेको अष्ट्रेलियाका सुरुवाती ब्याटर मिचेल मार्स ९ रन बनाएर फर्किएका थिए । तर अर्का ओपनर वार्नरले ९३ बलमा ११ चौका र ३ छक्का सहित १ सय ४ रन बनाए । वार्नर र स्टिभ स्मिथले तेस्रो विकेटका लागि १४२ रनको साझेदारी गरेका थिए। स्मिथले ९ चौका र १ छक्का सहित ६८ बलमा ७१ रन बनाए ।
चौथो नम्बरमा ब्याटिङ गरेका मार्नस ल्याबुसेनले पनि ४७ बलमा ७ चौका र २ छक्का सहित ६२ रन बनाए । जोस इंग्लिस १४ रन बनाएर आउट भए ।
त्यसपछि ४०औं ओभरमा ब्याटिङ गर्न आएका म्याक्सवेलले ४४ बलमा ९ चौका र ८ छक्का सहित विष्फोटक पारि खेल्दै १ सय ६ रन बनाए । यस्तै क्यामरन ग्रीनले ८ रन बनाउँदा मिचेल सटार्कले रन बनाउन सकेनन् । कप्तान प्याट कमिन्स १२ र एडम जाम्पा १ रनमा नटआउट गरे।
बलिङ तर्फ नेदरल्याण्ड्सका बास डे लेडा ओडीआईको एक खेलमा सर्वाधिक रन खर्चिनै बलर बनेका छन् । २ विकट लिएका उनले १० ओभरमा १ सय १५ रन खर्चेका हुन् । यसअघि एडम जाम्पाले दक्षिण अफ्रिका विरुद्ध यही वर्ष १ सय १३ रन खर्चिएर मिक लुइसको बिर्सनलायक कीर्तिमान बराबरी गरेका थिए।
नेदरल्याण्ड्सका लोगन भ्यान बिकले १० ओभरमा ७४ रन खर्चेर सर्वाधिक ४ विकट लिए । यस्तै आर्यन दत्तले १ विकेट लिए।