काठमाडौं (हाम्रो खेलकुद) – नेपालले त्रिकोणात्मक टि२० आई सिरिजको फाइनल खेलमा शुक्रबार युएईसँग खेल्दैछ । खेल बिहान-११ बजे टियु क्रिकेट मैदानमा सुरु हुनेछ । नेपालले हङकङ र युएईलाई समान दुई खेलमा हराएको थियो । युएईले हङकङलाई एक खेलमा हराउँदै नेटरनरेटका कारण फाइनलमा पुगेको थियो । समान २ अंक भएपनि युएई नेटरनरेटको कारण फाइनल खेलेको हो ।

नेपालले पछिल्लो खेलमा युएईलाई ५ विकेटले हराएको थियो । उक्त खेलबाट नेपालले टोलीमा एक परिवर्तन गर्ने सम्भावना छ । अलराउन्डर विवेक यादवलाई बेन्चमा राख्दै स्पिनर ललितनारायण राजवंशीलाई मौका दिने सम्भावना छ । पछिल्लो समय ललित युएईविरुद्ध हाबी हुँदै आएका छन् ।

चोटपछि फर्किएका उनी टोलीको प्रमुख स्पिनरको रुपमा खेल्ने सम्भावनाछ । सन्दीप लामिछाने टोलीमा छैनन् । त्यसैको कारण ललित प्रमुख स्पिनर हुन् । अर्कोतर्फ विश्वकप छनोट अघि यो अन्तिम खेल हुँदा ललितलाई मौको दिने देखिन्छ । ललितलाई पार्टटाइम स्पिनर दीपेन्द्रसिंह ऐरी र कुशल मल्लले साथ दिनेछन् । आवश्यक परेमा रोहित पौडेल र कुशल भुर्तेल विकल्प हुनसक्छन् ।

नेपालको टोलीमा अन्य परिवर्तनको सम्भावना छैन । ओपनरमा कुशल भुर्तेल र आसिफ शेख हुनेछन् । कुशल भर्तेलबाट टोली फाइनलमा उत्कृष्ट प्रदर्शन चाहन्छ । आसिफले युएईविरुद्ध ५० बलमा ६२ रन बनाएका थिए । त्यसले उनको मनोबल फेरिन सक्छ । नेपालले पछिल्ला दुुई खेलमा सोमपाल कामीलाई तेस्रो नम्बरमा पठाएको थियो ।

तर युएईविरुद्ध कुशल मल्ल तेस्रो नम्बरमा खेल्नेछन् । कुशल मल्ल नेपालका प्रमुख टि२० खेलाडी हुन् । उनको प्रदर्शन महत्वपूर्णहुनेछ । सोमपाल तल्लोक्रममा खेल्नेछन् ।

चौथोमा कप्तान रोहित पौडेल र पाँचौंमा दीपेन्द्रसिंह ऐरी हुनेछन् । दीपेन्द्र नेपालका फिनिसर हुन् । पछिल्लो खेलमा युएईविरुद्ध दीपेन्द्रले १५ बलमा ४० रन बनाउँदै नेपालको जित पक्का गराएका थिए । दीपेन्द्रको ब्याटिङ, बलिङ र फिल्डिङ तीनै क्षेत्रमा प्रदर्शन नेपालको लागि महत्वपूर्ण हुनेछ ।

नेपालको ब्याटिङमा गहिराई छ । करण केसी, सोमपाल कामी र गुलशन झा पनि राम्रो ब्याटिङ गर्र्ने गर्दछन् । करण युएईलाई भारी पर्नसक्छन् । नेपालका तीव्र गतिका बलर करण केसी र सोमपाल कामीको बलिङ महत्वपूर्ण हुनेछ । युएईको ब्याटिङ शीर्षक्रममा निर्भरछ । ओपनर मोहम्मद वासिम, वृत्य अरविन्द र आसिफ खान प्रमुख ब्याटर हुन् । त्यसैले सुरुवातमा करण र सोमपालको बलिङ निकै महत्वपूर्ण हुने देखिन्छ ।

यी तीन ब्याटरको प्रदर्शनले युएईको योगफल निर्धारण हुने देखिन्छ । अभिनाश बोहरा नेपालको डेथ ओभर स्पेलिष्ट बलर हुन् । नेपालसँग तीन प्रमुख तीव्र गतिका बलर हुनेछन् । गुलशन झा पार्टटाइम तीव्र गतिका बलर हुनेछन् ।

नेपालको सम्भावित प्लेइङ ११ :

कुशल भुर्तेल, आसिफ शेख (विकेटकिपर), कुशल मल्ल, रोहित पौडेल (कप्तान), दीपेन्द्रसिंह ऐरी, सन्दीप जोरा, गुलशन झा, सोमपाल कामी, करण केसी, अभिनाश बोहरा र ललित नारायण राजवंशी ।