काठमाडौं (हाम्रो खेलकुद) – ओमानले आइसिसी टि२० विश्वकप एसिया क्षेत्र फाइनलमा छनोटमा मलेसियालाई ३२ रनले हराउँदै विजयी सुरुवात गरेको छ । जितको लागि १ सय ५४ रनको विजयी लक्ष्य पछ्याएको मलेसियाले निर्धारित २० ओभरमा ८ विकेट गुमाउँदै १ सय २१ रन बनायो ।

मलेसियाको लागि विरनदीप सिंह ५३ बलमा २ चौका र २ छक्कासहित ५७ रनमा अविजित रहेपनि जिताउन सकेनन् । योसँगै विरनदीप टि२० आई करिअरमा स्कटल्यान्डका रिची बेरिंग्टनपछि २ हजार रन पूरा गर्ने दोस्रो एसोसिएट ब्याटर बनेका छन् ।

विरनदीप बाहेक अन्य कुनैपनि मलेसियाली ब्याटरले राम्रो प्रदर्शन गर्न सकेनन् । जुबैदी जुल्फिकी १४, अहमद फैज १३, स्याजरुल एजात इद्रुसले १० रन बनाए । अन्य ब्याटरले दोहोरो अंकमा रन बनाउन सकेनन् ।

ओमानका बिलाल खान र जिशान मकसुदले समान दुई विकेट लिए । फयाज बट, सकिल अहमद, आयन खान र अकिब इलियासले एक एक विकेट लिए ।

त्यसअघि टियु क्रिकेट मैदानमा टस जितेर पहिला ब्याटिङ रोजेको ओमानले निर्धारित २० ओभरमा ६ विकेट गुमाउँदै १ सय ५३ रन बनाएको थियो । ओमानको जितमा कप्तान जिशान मकसुद ४६ बलमा ५ चौका र २ छक्कासहित सर्वाधिक ५६ रनमा नट आउट रहे । मोहम्मद नदीम ११ बलमा २ चौका र १ छक्कासहित २१ रनमा नट आउट रहे ।

अन्तिम ओभरमा रिजवान हैदरलाई मकसुद र नदिमले दुई छक्का र एक चौका गरि कुल १९ रन बनाएको थियो । त्यसअघिको १९ औं ओभरमा ओमानले १४ रन जोडेको थियो । अन्तिम दुई ओभरको रन ओमानलाई जितको लागि महत्वपूर्ण रह्यो ।

ओपनर कश्याप प्रजापति १६ बलमा ३ चौका र १ छक्कासहित २५, प्रतीक अथवले १२, अकिब इलियास ८, शोएब खान ४ र मेहरान खान १५ रनमा आउट भए ।

मलेसियाका विरनदीप सिंहले ४ ओभरमा २४ रन खर्चेर ३ विकेट लिए । पवनदीप सिंह, रिजवान हैदर र विजय उन्नीले एक एक विकेट लिए । ओमानले सोमबार पहिलो खेलमा बिहान टियु मैदानमा सिंगापुरसँग खेल्नेछ । मंगलबार मलेसियाले दोस्रो खेल नेपालसँग दिउँसो खेल्नेछ ।