काठमाडौं (हाम्रो खेलकुद) – नेपालले आइसिसी टि२० विश्वकप एसिया क्षेत्र फाइनल छनोटको सेमिफाइनल टियु क्रिकेट मैदानमा खेल्न ओमानलाई हराउनुपर्ने भएको छ । समूह ए बाट ओमान र नेपाल एक खेल अगावै सेमिफाइनलमा पुगेका छन् ।

आइसिसीको नियम अनुसार सेमिफाइनल समूह ए को विजेताले टियु र समूह बी को विजेताले मुलपानीमा खेल्नुपर्ने हुन्छ । त्यसैको कारण समूह ए को विजेता बन्न नेपालले अन्तिम खेलमा बिहीबार ओमानलाई हराउनु पर्ने हुन्छ ।

ओमान २ खेलमा ४ अंकका साथ शीर्ष स्थानमाछ । नेपाल २ खेलमा ४ अंक भएपनि नेटरनरेटको कारण दोस्रो स्थानमा छ । नेपालको नेटरनरेट १.३२२ र ओमानको १.३५० छ । यदि नेपाल पराजित भए वा वर्षाको कारण रद्ध भएमा भने मुलपानीमा गएर सेमिफाइनल खेल्नुपर्ने हुन्छ ।

समूह बी मा भने चारै टोलीको सेमिफाइनल सम्भावना कायमै छ । युएई २ खेलमा ४ अंकका साथ शीर्षस्थानमा छ । बहराइन २ खेलमा २ मा जितका साथ दोस्रो स्थानमा छ । हङकङ २ खेलमा २ अंक भएपनि नेटरनरेटका कारण तेस्रो स्थानमा छ ।

मंगलबार बहराइनले हङकङलाई २० रनले हराएपछि समूह बी मा सबै टोलीको सेमिफाइनल समिकरण कायमै रहेको हो । कुवेत २ खेलमा अंक विहीन हुँदै पुछारमा छ ।

बिहीबार बिहान युएई र हङकङ तथा कुवेत र बहराइनबीच प्रतिस्पर्धा हुनेछ । यी दुई खेलको नतिजापछि समूह बी को सेमिफाइनल र समूह विजेता निर्धारण गर्नेछ ।

शुक्रबार दुबै सेमिफाइनल बिहान-११ बजे सुरु हुनेछन् । टियु क्रिकेट मैदानमा समूह ए को विजेता र समूह बी को उपविजेताबीच सेमिफाइनलमा प्रतिस्पर्धा हुनेछ ।

उता मुलपानीमा समूह बी को विजेता र समूह ए को उपविजेताबीच प्रतिस्पर्धा हुनेछ । समूह ए का सबै खेल टियु र समूह बी को सबै मुलपानीमा हुनेछन् । त्यसैले समूह विजेताले आफू खेलेको मैदानमा सेमिफाइनल खेल्ने अवसर पाउनेछन् ।

फाइनल भने आइतबार दिउँसो ११ बजे टियु मैदानमा हुनेछ । फाइनलमा पुग्ने दुई टोलीले २०२४ मा अमेरिका र वेस्टइन्डिजमा हुने टि२० विश्वकप खेल्न पाउनेछन् ।