एजेन्सी – ओपनर फखार जमानको उत्कृष्ट पूनरागमनमा पाकिस्तानले आइसिसी विश्वकप २०२३ मा बंगलादेशमाथि ७ विकेटको सानदार जित हात पारेको छ । यो जितसँगै पाकिस्तानले १० अंकका साथ शीर्ष चारमा रहँदै सेमिफाइनल खेल्ने सम्भावना कायमै राखेको छ । सुरुवाती दुई खेल जितेको पाकिस्तानले त्यसपछि लगातार चार खेल हारेको थियो ।

जितको लागि २ सय ५ रनको मध्यम विजयी लक्ष्य पछ्याएको पाकिस्तान ३२.३ ओभरमा ३ विकेट गुमाउँदै पूरा गर्यो । पाकिस्तानको जितमा फखार जमानले ७४ बलमा ३ चौका र ७ छक्कासहित ८१ रनको योगदान दिए ।

पहिलो खेलमा नेदरल्यान्ड्ससँगको खेलपछि पाकिस्तानले उनलाई बेन्चमा राखेको थियो । पछिल्लो समय लगातार मौका पाउँदा पनि राम्रो गर्न नसकेपछि उनी बेन्चमा बस्नु परेको थियो । तर अर्का ओपनर इमाम उल हकले पनि राम्रो खेल्न नसकेपछि जमानले खेल्ने मौका पाएका थिए । पुन मौका पाएको खेलमा उनले लय समाएका छन् ।

अर्का ओपनर अब्दुल्लाह शफिक ६९ बलमा ९ चौका र २ छक्कासहित ६८ रनमा आउट भए । बाबर आजम भने १६ बलमा १ चौकासहित ९ रनमा क्याच आउट भए । मोहम्मद रिजवान २१ बलमा ४ चौकासहित २६ र इफ्तिखार अहमद १५ बलमा २ चौकासहित १७ रनमा नट आउट रहे । बंगलादेशका स्पिनर मेहेदी हसन मिराजले ९ ओभरमा ६० रन खर्चेर ३ विकेट लिए ।

त्यसअघि इर्डेन गार्डेन कोलकातामा टस जितेर पहिला ब्याटिङ रोजेको बंगलादेश ४५.१ ओभरमा २ सय ४ रनमा अल आउट भयो । बंगलादेशका महमुदूल्लाह रियाद ७० बलमा ६ चौका र १ छक्कासहित सर्वाधिक ५६ रनमा आउट भए ।

कप्तान सकिब अल हसन ६४ बलमा ४ चौकासहित ४३, मेहेदी हसन मिराज २५ र मुश्फिकुर रहिम ५ रनमा आउट भए । ओपनर लिटन दास भने ६४ बलमा ६ चौकासहित ४५ रनमा आउट भए ।

पाकिस्तानका तीव्र गतिका बलर शाहिन शाह अफ्रिदीले ९ ओभरमा १ मेडनसहित २३ रन खर्चेर ३ विकेट लिए । मोहम्मद वासिम जुनियरले ८.१ ओभरमा १ मेडनसहित ३१ रन खर्चेर ३ विकेट लिए । हरिस रौफले ८ ओभरमा ३६ रन खर्चेर २ विकेट लिए । इफ्तिखार अहमद र उस्मा मिरले एक एक विकेट लिए ।

पाकिस्तान ७ खेलमा ३ मा जित र ४ मा हारसहित ६ अंकका साथ पाँचौं स्थानमा छ । पाकिस्तानले अव ४ नोभेम्बरमा न्युजिल्यान्ड र ११ नोभेम्बरमा इंग्ल्यान्डसँग खेल्ने छ । यी दुबै खेलमा विजयी भएमा पाकिस्तानको १० अंक हुनेछ ।

१० अंकका साथ सेमिफाइनल खेल्न न्युजिल्यान्ड र अष्ट्रेलियाको नतिजा आफु अनुकुल आउनुपर्छ । यी देशले कम्तिमा दुई नभए तीनै खेल हार्दा पाकिस्तान सेमिफाइनल खेल्ने सम्भावना बलियो हुनेछ ।

भारत ६ खेलमा १२ अंकका साथ शीर्षस्थानमा छ । दक्षिण अफ्रिका ६ खेलमा १ मा हार र ५ मा जितसहित १० अंकका साथ दोस्रो स्थानमा छ । न्युजिल्यान्ड ६ खेलमा ४ मा जित र २ मा हारसहित ८ अंकका साथ तेस्रो स्थानमा छ ।

६ खेलमा समान नजिताको साथ ८ अंक भएपनि अष्ट्रेलिया चौथो स्थानमा छ । अफगानिस्तान ६ खेलमा ६ अंकका साथ छैटौं स्थानमा छ । साविक विजेता इंग्ल्यान्ड ६ खेलमा २ अंकका साथ पुछारमा छ ।