काठमाडौं (हाम्रो खेलकुद) – नेपालका तीव्र गतिका बलर सोमपाल कामीले टि२० आईमा ५० औं विकेट पूरा गरेका छन् । आइसिसी टि२० विश्वकप एसिया क्षेत्र फाइनल छनोटमा ओमानविरुद्ध २ विकेट लिँदै ५० विकेट पूरा गरेका हुन् ।

सोमपालले छैटौं ओभरको तेस्रो बलमा शाएब खानलाई बोल्ड गर्दै ५० औं विकेट पूरा गरेका थिए । सोमपाल नेपालमा सन्दीप लामिछाने, करण केसी र अभिनाश बोहरापछि टि२० आईमा ५० औं विकेट पूरा गर्ने चौथो बलर हुन् । उनले ५३ औं खेलमा यस सफलता हात पारेका हुन् ।

टियु मैदानमा टस हारेर पहिला ब्याटिङ थालेको ओमानले ६ ओभरमा ४ विकेट गुमाउँदै ४२ रन बनाएको छ । आएन खान ४ र जिशान मकसुद २ रनमा क्रिजमा छन् ।

त्यसअघि तीव्र गतिका बलर करण केसीको पाँचौं बलमा कश्याप प्रजापति एज लगाउने धुनमा विकेटकिपर आसिफ शेखबाट क्याच आउट भएका थिए । कश्याप उनी ५ बलमा २ चौकासहित ८ रनमा आउट भए ।

सोमपाल कामीको चौथो ओभरको अन्तिम बलमा प्रतीक अथावलेको १४ रनमा वैकल्पिक फिल्डर प्रतिश जि.सीले क्याच छाडेका थिए । प्रतिश गुलशन झाको स्थानमा फिल्डिमा आएका थिए ।

सोमपालले चौथो ओभरको पहिलो बलमा ओमानका प्रमुख ब्याटर अकिब इलियासलाई २ रनमा बोल्ड आउट गरेका हुन् । अकिब ओमानका प्रमुख ब्याटर हुन् ।

गुलशन झाको पाँचौं ओभरको अन्तिम बलमा प्रतीक मिडअफमा रोहित पौडेलबाट क्याच आउट भए । उनी १८ बलमा २ चौका र १ छक्कासहित २४ रनमा आउट भए ।