एजेन्सी – अफगानिस्तानले आइसिसी विश्वकप २०२३ मा नेदरल्यान्ड्समाथि ७ विकेटको सहज जित हात पारेको छ । यस जितसँगै अफगानिस्तानको सेमिफाइनल सम्भावना कायमै छ ।

जितको लागि १ सय ८० रनको विजयी लक्ष्य पछ्याएको अफगानिस्तानले ३१.३ ओभरमा ३ विकेट गुमाउँदै पूरा गर्यो । अफगानिस्तानका हश्मातुल्लाह शाहिदी ६४ बलमा ६ चौकासहित ५६ रनमा अविजित रहे । आजमतुल्लाह ओमरजाई २८ बलमा ३ चौकासहित ३१ रनमा नट आउट रहे ।

ओपनर रहमानउल्लाह गुरबाज १० र इब्राहिम जद्रान २० रनमा आउट भएका थिए । रहमात शाह ५४ बलमा ८ चौकासहित ५२ रनमा आउट भए । नेदरल्यान्ड्सका लोगन भान बिक, पाउल भान मिकेरेन र सकिब जुल्फिकरले समान एक विकेट लिए ।

त्यसअघि लखनऊमा टस जितेर पहिला ब्याटिङ रोजेको नेदरल्यान्ड्स ४६.३ ओभरमा १ सय ७९ रनमा अल आउट भएको थियो । नेदरल्यान्ड्सका स्याब्रान्ड एंगेलब्रेक्टले ८६ बलमा ६ चौकासहित सर्वाधिक ५८ रन बनाए । म्याक्स ओडाउड ४० बलमा ९ चौकासहित ४२ रनमा रन आउट भए ।

कोलिन एकरम्यान ३५ बलमा ४ चौकासहित २९ रनमा आउट भए । नेदरल्यान्ड्सका कप्तान स्कट एडवार्ड्स, एकरम्यान, म्याक्स ओडाउड र एंगेलब्रेक्ट रन आउट भएका थिए । शीर्ष पाँच मध्य चार ब्याटर रन आउट भएपछि नेदरल्यान्ड्सले विशाल योगफल बनाउने अवसर गुमाएको थियो । एक समय नेदरल्यान्ड्स १८ ओभरमा ९२–२ को बलियो अवस्थामा रहेपनि रन आउट घातक बनेको थियो ।

अफगानिस्तानका मोहम्मद नाबीले ९.३ ओभरमा १ मेडनसहित २८ रन खर्चेर ३ विकेट लिए । नुर अहमदले ९ ओभरमा ३१ रन खर्चेर २ विकेट लिए । मुजिब उर रहमानले एक विकेट लिए । अफगानिस्तानले अव ७ नोभेम्बरमा अष्ट्रेलिया र १० नोभेम्बरमा दक्षिण अफ्रिकासँग खेल्नेछ । नेदरल्यान्ड्सले ८ नोभेम्बरमा इंग्ल्यान्ड र १२ नोभेम्बरमा भारतसँग खेल्नेछ ।

नेदरल्यान्ड्स ७ खेलमा २ मा जित ५ मा हारसहित ४ अंकका साथ आठौं स्थानमा छ । अफगानिस्तान ७ खेलमा ४ मा जित र ३ मा हारसहित ८ अंकका साथ पाँचौं स्थानमा छ । भारत ७ खेलमा १४ अंकका साथ सेमिफाइनलमा पुगि सकेको छ ।