एजेन्सी – पाकिस्तानका ओपनर फखर जमानले आइसिसी विश्वकप २०२३ मा न्युजिल्यान्डविरुद्ध विष्फोटक शतक बनेका छन् । विशाल विजयी लक्ष्य पछ्याउनेक्रममा जमानले बलमा शतक हानेका हुन् ।

उनले ६३ बलमा आफ्नो ओडिआई करिअरको ११ औं र विश्वकपको पहिलो शतक हानेका हुन् । उनी पाकिस्तानबाट सर्वाधिक छिटो विश्वकपमा शतक हान्ने खेलाडी समेत बनेका छन् ।

जितका लागि ४ सय २ रनको विशाल विजयी लक्ष्य पछ्याएको पाकिस्तानले २१ ओभरमा १ विकेट गुमाउँदै १ सय ६० रन बनाएको छ । फखर जमान ६७ बलमा ७ चौका र ९ छक्कासहित १ सय ६ रनमा अविजित रहे ।

बाबर आजम ५० बलमा ४ चौका र १ छक्कासहित ४६ रनमा क्रिजमा छन् । दोस्रो विकेटका लागि बाबर र जमानले १ सय ५३ रनको साझेदारी गरि सकेका छन् ।

त्यसअघि बेंगलोरमा टस हारेर पहिला ब्याटिङको निम्तो पाएको न्युजिल्यान्डले निर्धारित ५० ओभरमा ६ विकेट गुमाउँदै ४ सय १ रन बनाएको थियो । यो न्युजिल्यान्डको ओडिआई इतिहासको दोस्रो ठूलो योगफल हो । न्युजिल्यान्डले २००८ मा आयरल्यान्डविरुद्ध ४ सय २ रन बनाएको थियो । त्यो नै हालसम्मको उच्च योगफल हो ।

न्युजिल्यान्डका ओपनर रचिन रविन्द्रले ९४ बलमा १५ चौका र १ छक्कासहित १ सय ८ रनको सानदार शतकीय इनिङ खेले । जारी विश्वकपमा उनको यो तेस्रो शतक हो । यसअघि रविन्द्रले इंग्ल्यान्डविरुद्ध १ सय २३ र अष्ट्रेलियाविरुद्ध १ सय १६ रन बनाएका थिए ।

कप्तान केन विलियम्सन ७९ बलमा १० चौका र २ छक्कासहित ९५ रनमा आउट भए । चोटपछि फर्किएका उनी शतक बनाउन पाँच रनले चुकेका थिए । स्पिनर इफ्तिखर अहमदको बलमा विलियम्सन फखार जमानबाट क्याच आउट भएका थिए ।