एजेन्सी – अफगानिस्तानले आफ्नो क्रिकेट इतिहासमा पहिलो पटक च्याम्पियन्स ट्रफी खेल्ने भएको छ । भारतमा जारी आइसिसी विश्वकप २०२३ मा अफगानिस्तानले अन्तिम ८ मा रहँदै च्याम्पियन्स ट्रफी खेल्ने पक्का भएको हो ।

च्याम्पियन्स ट्रफी यस विश्वकपको अंक तालिकामा पाकिस्तान बाहेक शीर्ष ७ टोलीले खेल्न पाउनेछन् । पाकिस्तान भने घरेलु टोली हुँदा सोझै छनोट भएको थियो । सन् २०२५ मा पाकिस्तानमा हुने उक्त च्याम्पियन्स ट्रफी भारत, दक्षिण अफ्रिका, अष्ट्रेलिया, न्युजिल्यान्ड, पाकिस्तान र अफगानिस्तानले खेल्ने पक्का भएको छ ।

अव बंगलादेश, श्रीलंका, नेदरल्यान्ड्स र इंग्ल्यान्ड मध्य दुई टोलीले मात्रै खेल्न पाउनेछन् । यी चार मध्य यस विश्वकपको अंक तालिकामा माथि रहने दुई टोलीले च्याम्पियन्स ट्रफी खेल्न पाउनेछन् । साविक विजेता इंग्ल्यान्डले भने च्याम्यिन्स ट्रफी २०२५ गुमाउने उच्च सम्भावना छ ।

बंगलादेश ८ खेलमा ४ अंकका साथ सातौं स्थानमा छ । श्रीलंका ८ खेलमा ४ अंकका साथ आठौं स्थानमा छ । नेदरल्यान्ड्स ७ खेलमा ४ अंकका साथ नवौं स्थानमा छ । इंग्ल्यान्ड ७ खेलमा २ अंकका साथ पुछारमा छ । च्याम्पियन्स ट्रफी खेल्न इंग्ल्यान्डले विश्वकपमा आफ्ना अन्तिम दुई खेल नेदरल्यान्ड्स र पाकिस्तान दुबैलाई हराउनु पर्ने हुन्छ । अन्यथा पहिलो पटक च्याम्पिन्स ट्रफी नखेल्ने सम्भावना देखिन्छ ।

जारी विश्वकपमा भारत ८ खेलमा १६ अंकका साथ शीर्षस्थानमा छ । दक्षिण अफ्रिका ८ खेलमा ६ मा जित र २ मा हारसहित १२ अंकका साथ दोस्रो स्थानमा छ । यी दुबै टोली विश्वकपको सेमिफाइनलमा पुगेका छन् ।

अष्ट्रेलिया ७ खेलमा १० अंकका साथ तेस्रो स्थानमा छ । आजको खेलमा अष्ट्रेलियाले अफगानिस्तानलाई हराएको खण्डमा सेमिफाइनलमा पुग्नेछ । न्युजिल्यान्ड ८ खेलमा ८ अंकका साथ चौथो स्थानमा छ । पाकिस्तान ८ खेलमा ८ अंकका साथ पाँचौं स्थानमा छ । अफगानिस्तान ७ खेलमा ८ अंकका साथ छैटौं स्थानमा छ ।

च्याम्पियन्स ट्रफी पछिल्लो पटक २०१७ मा इंग्ल्यान्डमा भएको थियो । फाइनलमा पाकिस्तानले भारतलाई १ सय ८० रनले हराउँदै उपाधि जितेको थियो ।

त्यसपछि भने आइसिसीले च्याम्पियन्स ट्रफीलाई हटाएको थियो । तर २०२५ देखी पुन सुरु हुँदैछ । सन् १९९८ देखी सुरु भएको च्याम्पियन्स ट्रफी अष्ट्रेलिया र भारतले सर्वाधिक दुई पटक जितेको छन् । न्युजिल्यान्ड, पाकिस्तान, दक्षिण अफ्रिका, श्रीलंका र वेस्टइन्डिजले समान एक पटक उपाधि जितेका छन् ।