एजेन्सी – भारतमा जारी आइसिसी विश्वकप २०२३ मा अन्तिम चारमा रहेर सेमिफाइनल खेल्न चार टोलीको सम्भावना बाँकी छ । विश्वकपमा भारत, दक्षिण अफ्रिका र अष्ट्रेलिया सेमिफाइनलमा पुगेका छन् । अव चार मध्य एक टोली मात्रै सेमिफाइनलमा पुग्नेछन् ।

भारत ८ खेलमा १६ अंकका साथ शीर्षस्थानमा छ । भारतले शीर्षस्थानमा रहँदै सेमिफाइनल खेल्नेछ । भारतले चौथो स्थानमा रहने टोलीसँग नोभेम्बर १५ मा सेमिफाइनल खेल्नेछ ।

दक्षिण अफ्रिका ८ खेलमा ६ मा जित र २ मा हारसहित १२ अंकका साथ दोस्रो स्थानमा छ । अष्ट्रेलिया ८ खेलमा ६ मा जित र २ मा हारसहित १२ अंकका साथ नेटरनरेटका कारण तेस्रो स्थानमा छ ।

दोस्रो सेमिफाइनलमा नोभेम्बर १६ मा दक्षिण अफ्रिका र अष्ट्रेलियाबीच हुनेछ । अव न्युजिल्यान्ड, पाकिस्तान, अफगानिस्तान र नेदरल्यान्ड्स मध्य एक टोलीले सेमिफाइनल खेल्नेछन् । सबै टोलीको समिकरण यस प्रकार छ ।

न्युजिल्यान्ड –

सुरुवाती चार खेल जितेको न्युजिल्यान्ड लगातार चार हारको कारण सेमिफाइनलमा पुग्न केहि संघर्ष गरेको छ । तर अन्य टोलीको भन्दा न्युजिल्यान्डको नेटरनरेट राम्रो छ । न्युजिल्यान्ड ८ खेलमा ४ मा जित र ४ मा हारससहित ८ अंकका साथ चौथो स्थानमा छ । न्युजिल्यान्डले अन्तिम खेल बिहीबार श्रीलंकासँग खेल्नेछ ।

उक्त खेलमा विजयी भएमा १० अंकमा पुग्नेछ । न्युजिल्यान्डको नेटरनरेट ०.३९८ छ । पाकिस्तानको नेटरनरेट ०.०३६ हुँदा अन्यको माइनस छ । न्युजिल्यान्ड अन्तिम खेलमा विजयी हुनुपर्छ । विजयी फराकिलो हुँदा सहज रुपमा सेमिफाइनलमा पुग्न सक्छ ।

अझ पाकिस्तान र अफगानिस्तान अन्तिम खेलमा पराजित भएमा नेटरनरेटको कुनै झन्झट हुनेछैन । अन्तिम खेलमा श्रीलंकामाथि केहि फराकिलो जित हात पार्न सके न्युजिल्यान्डले सेमिफाइनल खेल्नेछ ।

पाकिस्तान

पाकिस्तान ८ खेलमा ८ अंकका साथ पाँचौं स्थानमा छ । सुरुवाती दुई खेल जितेको पाकिस्तानले त्यसपछि लगातार चार खेल हारेको थियो । पछिल्ला दुई खेल जितेको थियो । पाकिस्तानले अन्तिम खेल शनिबार इंग्ल्यान्डसँग खेल्नेछ ।

पाकिस्तान सेमिफाइनल खेल्न अन्तिम खेलमा फराकिलो जित हात पार्नुपर्छ । अथवा अफगानिस्तान र न्युजिल्यान्ड अन्तिम खेलमा पराजित हुँदा पाकिस्तानलाई जित पर्याप्त हुनेछ ।

पाकिस्तान १० अंकका साथ सेमिफाइनल खेल्न फराकिलो जितको आवश्यकता देखिन्छ । जित मात्रै भने पर्याप्त हुनेछैन । बिहीबार न्युजिल्यान्डको नतिजापछि पाकिस्तानको सम्भावना देखिनेछ ।

अफगानिस्तान

अफगानिस्तान ८ खेलमा ८ अंकका साथ छैटौं स्थानमा छ । अफगानिस्तान सेमिफाइनल खेल्न अन्तिम खेलमा शुक्रबार दक्षिण अफ्रिकालाई फराकिलो अन्तरले हराउनु पर्छ ।

अफगानिस्तानको नेटरनरेट माइनस ०.३३८ छ । सामान्य जितले मात्रै अफगानिस्तान सेमिफाइनलमा पुग्न सक्दैन । फराकिलो जित हात पार्नुपर्छ । अथवा पाकिस्तान र न्युजिल्यान्ड अन्तिम खेलमा पराजित भएमा अफगानिस्तानलाई सेमिफाइनल खेल्न जित पर्याप्त हुनेछ ।

नेदरल्यान्ड्स

सेमिफाइनलमा पुग्न नेदरल्यान्ड्सको पनि अंक गणीतिय सम्भावना छ । नेदरल्यान्ड्स ७ खेलमा २ मा जितसहित ४ अंकका साथ नवौं स्थानमा छ । नेदरल्यान्ड्सले बाँकी दुई खेल भारत र इंग्ल्यान्डसँग खेल्नेछ ।

यी दुबै खेलमा विजयी भएमा नेदरल्यान्ड्स ८ अंकमा पुग्नेछ । तर ८ अंकका साथ सेमिफाइनल खेल्न अफगानिस्तान, पाकिस्तान र न्युजिल्यान्डले अन्तिम खेलमा सबैले हार्नुपर्छ ।

अन्तिम खेलमा यी तीन टोलीले फराकिलो हार ब्यहोरेको खण्डमा र उता नेदरल्यान्ड्सले दुबै खेलमा विशाल जित हात पार्न सके चार टोलीको ८–८ अंक हुनेछ । यो अवस्थामा नेटरनरेटमा माथि रहँदै नेदरल्यान्ड्स सेमिफाइनल खेल्न सक्छ ।