एजेन्सी – भारतमा जारी आईसीसी विश्वकप क्रिकेटको आफ्नो अन्तिम खेलमा इंग्ल्याण्डले पाकिस्तानलाई ९३ रनले पराजित गरेको छ ।

३ सय ३८ रनको विशाल लक्ष्य पछ्याएको पाकिस्तान ४३.३ ओभरमा २ सय ४४ रनमा अलआउट भयो।

पाकिस्तानका लागि आगा सलमानले ४५ बलमा ६ चौका र १ छक्का प्रहार गर्दै ५१ रन बनाएर एकमात्र अर्धशतक पूरा गरे । कप्तान बाबर आजमले ४५ बलमा ६ चौका प्रहार गर्दै ३८ रन बनाए ।

मोहम्मद रिजवानले ३६ रन र साउद शकीलले २९ रन बनाए। बलर जोडी शाहिन शाह अफ्रिदी २२ बलमा २५ र हरिस रउफले २३ बलमा ३५ रन बनाएका थिए ।

अब्दुल्लाह शफिकले रन बनाउन सकेनन् भने उनका ओपनिङ पार्टनर फखर जमानले मात्र १ रनमा आउट भए । इफ्तिखार अहमदलले ३ र शादाब खानले ४ रन जोडे । मोहम्मद वासिम १८ रनमस नटआउट रहे

इंग्ल्यान्डका लागि डेभिड विलीले ३ विकेट लिए । गस एटकिन्सन, मोइन अली र आदिल रसिदले समान २ विकेट लिए । क्रिस वोक्सले १ विकेट लिए ।

पहिलो टस जितेर ब्याटिङ रोजेको इंग्ल्यान्डले ५० ओभरमा ९ विकेट गुमाएर ३ सय ३७ रन बनाएको थियो।

इंग्ल्याण्डका लागि बेन स्टोक्स, जो रुट र जोनी बेयरस्टोले अर्ध शतक बनाए । स्टोक्सले सर्वाधिक रन बनाउने क्रममा ७६ बलमा ११ चौका र २ छक्काका साथ ८४ रनको योगदान थिए ।

रुटले ७२ बलमा ४ चौका प्रहार गर्दै ६० रन बनाए । ओपनर बेयरस्टोले ६७ बलमा ७ चौका र १ छक्का प्रहार गर्दै ५९ रन बनाए ।

अर्का ओपनर डेविड मलानले ३९ बलमा ५ चौका प्रहार गर्दै ३१ रन बनाए । ह्यारी ब्रुकले १७ बलमा २ चौका र २ छक्कासहित ३० रन जोडे । कप्तान जोस बटलरले पनि १८ बलमा २७ रन थपे ।

डेभिड विलीले ५ बलमा १५ रन बनाए । मोइन अलीले रन बनाउन सके भने गस एटकिन्सन शून्यमा आउट भए। क्रिस वोक्स ४ रन र आदिल राशिद बिना रन नटआउट रहे ।

पाकिस्तानका हसिफ रउफले ३ विकेट लिए भने शाहिन शाह अफ्रिदी र मोहम्मद वासिम जुनियरले समान २ र इफ्तिकार अहमदले १ विकेट लिए ।

इङ्ग्ल्याण्ड यसअघि नै प्रतियोगिताबाट बाहिरिसकेको थियो । पाकिस्तानसँग सेमिफाइनल पुग्ने लगभग असम्भव अवसर थियो। लिग चरणमा पाकिस्तान ९ मध्ये ४ जितसहित पाँचौं स्थानमा आफ्नो यात्रा सकेको छ । इंग्ल्याण्ड ३ जितसहित सातौं स्थानमा छ।