एजेन्सी – अष्ट्रेलिया विश्वको सर्वाधिक सफल टोली हो । आइतबार राती घरेलु टोली भारतलाई ६ विकेटले हराउदै छैटौं पटक विश्वकपको उपाधि जित्न सफल भयो ।

अष्ट्रेलियाले महिला र पुरुषको गरि कुल २० विश्वकप जितेकोछ । सुरुवाती दुई खेल हारेको अष्ट्रेलियाले सानदार पुनरागमन गर्दै उपाधि जित्यो ।

भारतलाई लाखौं दर्शकको सामु स्तब्ध पार्दै उपाधि जितेको अष्ट्रेलियाबाट नेपालले थुप्रै प्रेरणा लिनसक्छ । जुन प्रेरणाले आगामी दिनमा नेपाली क्रिकेटलाई धेरै माथि पुर्याउन सक्छ । अष्ट्रेलियाबाट नेपालले सिक्नुपर्ने ६ प्रेरणा यस प्रकार छन् ।

६.खराब अवस्थामा हार नमान्नु

नेपालले अफगानिस्तानविरुद्ध खेलमा ग्लेन म्याक्सवेलले खेलेको २ सय १ रनको अदभूत इनिङबाट राम्रो पाठ सिक्नुपर्छ ।

जितको लागि २ सय ९२ रनको विजयी लक्ष्य पछ्याएको अष्ट्रेलिया एक समय १८.३ ओभरमा ९१-७ को अवस्थामा थियो ।

सबैले अष्ट्रेलियाको हार पक्का जस्तै मानेका थिए । तर म्याक्सवेलले १ सय २८ बलमा २१ चौका र १० छक्कासहित २ सय १ रन बनाउदै जिताएका थिए ।

घाइते भएपनि उनले जिताएर फर्किएका थिए ।
आठौं विकेटका लागि प्याट कमिन्स र उनले २ सय २ रनको साझेदारी गरेका थिए । क्रिकेटमा असम्भव केही छैन भन्ने यो राम्रो उदाहरण हो ।

कहिले काहीँ टोलीको सुरुवात खराब हुनसक्छ । तर
जस्तोसुकै खराव अवस्थामा पनि हार खानु हुँदैन भन्ने राम्रो सन्देश हो ।

अर्कोतर्फ प्रमुख खेलाडीलाई बलर वा तल्लोक्रमका ब्याटरले साथ दिनुपर्छ । विकेट गुमाएर राम्रो खेल्नेलाई झन दबाबमा हाल्नु हुँदैन भन्ने राम्रो पाठ कमिन्सले सिकाएका छन् ।

५. विपक्षी मैदान र दर्शकलाई ध्यान नदिनु

क्रिकेटमा मैदान र दर्शकलाई १२ औं खेलाडी मानिन्छ । तर सधैं घरेलु मैदानमा खेल्न पाइदैन । विपक्षीको मैदान र हजारौं दर्शक सामु पनि राम्रो खेल्नुपर्छ । नेपालले देश बाहिर खासै राम्रो गर्न सकेको छैन ।

अष्ट्रेलियाले नरेन्द्र मोदि स्टेडियममा भारतीय १ लाख १० हजार दर्शकलाई पुरै खेलभर शान्त राख्यो । खेलाडीको काम राम्रो खेल्ने हो । विपक्षी दर्शकलाई शान्त राख्न आफुले सानदार क्रिकेट खेल्नुपर्छ ।

४.सुरुवातमा ध्यान नदिनु

क्रिकेटमा खेल होस् वा प्रतियोगिता सुरुवात भन्दा अन्त्य महत्त्वपूर्ण हुन्छ । अष्ट्रेलियाले सुरुवाती दुबै खेलमा दक्षिण अफ्रिका र भारतसँग हारेको थियो ।

तर पनि त्यो खराब सुरुवातले आफ्नो बाँकी प्रदर्शनमा असर पर्न दिएन । त्यसपछि लगातार ९ जितले उपाधी जित्यो ।

अफगानिस्तानविरुद्ध ९१-७ र भारतसँग फाइनलमा ४७-३ को अवस्थाबाट जितेको थियो । सुरुवात भन्दा पनि अन्त्य कति महत्त्वपूर्ण हुन्छ यो राम्रो उदाहरण हो ।

३ देशलाई पहिलो प्राथमिकतामा राख्नु

खेलाडीको लागि देश भन्दा ठुलो कुरा अरु हुँदैन । त्यसैले आफ्नो व्यक्तिगत सबै लोभ त्यागेर देशको लागि तयारी गर्नुपर्छ ।

आइपिएलमा करोडको वर्षा हुँदै आएका प्याट कमिन्सले २०२३ आइपिएल नखेल्ने निर्णय लिए । त्यस्तै स्टिभ स्मिथ र जोश हेजलवुडले पनि नखेल्ने जनाएका थिए ।

२०१५ देखि मिचेल स्टार्कले आइपिएल खेलेका छैनन् । अष्ट्रेलियालाई विश्वकप उपाधि जिताउन कमिन्स, स्टार्क र हेजलवुडको बलिङ निकै महत्त्वपूर्ण रह्यो ।

स्मिथले पनि अपेक्षा अनुसान नखेलेपनी राम्रो योगदान दिए । नेपाली खेलाडीले पनि सधैं देशलाई पहिलो प्राथमिकता सोच राख्नुपर्छ ।

२. बिग म्याच प्लेयर बनाउनु

कुनैपनि टोली च्याम्पियन बन्न सुपरस्टार खेलाडी भएर मात्रै हुँदैन । बिग म्याच प्लेयर पनि हुनुपर्छ । भारतले विश्वकपमा सानदार खेल्यो ।

तर उपाधि जित्न सकेन । टोलीमा रोहित शर्मा, विराट कोहली लोकेश राहुल जस्ता ब्याटर रहेपनि फाइनलमा रन बनाउन संघर्ष गर्यो ।

प्रतियोगिता जित्न स्टार खेलाडीले मात्रै हुँदैन बिग म्याच प्लेयर चाहिन्छ भन्ने अष्ट्रेलियाले राम्रो सन्देश दियो ।

ट्रविस हेड, कमिन्स, स्टार्क, वार्नर, स्मिथ, म्याक्सवेल र मार्श लगायत खेलाडी बिग म्याच प्लेयर थिए । त्यसैको कारण च्याम्पियन बन्यो ।

१. आफ्नो टिम, रणनीति र क्षमतामा सधैं विश्वास राख्नु

एउटा लक्ष्य लिएर हिँडेपछि त्यो पूरा नहुन सम्म बाहिरी आलोचनामा ध्यान दिनु हुँदैन । आफ्नो टिम र रणनीतिमा विश्वास राख्नुपर्छ ।

अष्ट्रेलियाले पुरै विश्वकप चार प्रमुख बलरका साथ खेल्यो । पाँचौं बलरको रुपमा म्याक्सवेललाई प्रयोग गरेको थियो । भारतीय कन्डीसनमा दुई स्पिनर टोलीमा नराखेको भन्दै आलोचना खेपेको थियो ।

तर त्यता ध्यान दिएन । चार प्रमुख बलरका साथ नै च्याम्पियन बन्यो । एक अतिरिक्त ब्याटर खेलाउन पाएको थियो ।

सुरुवाती हार र प्रदर्शनले कमिन्सको चर्को आलोचना भयो । कमिन्सलाई प्लेइङ-११ मा राख्न नहुने आवाज समेत उठेको थियो । तर फाइनलमा कमिन्सको कप्तानी र प्रदर्शन जितको मुख्य कारण थियो ।

अष्ट्रेलियाले मार्नस लाबुसेन र स्टिभ स्मिथ मध्य एकलाई खेलाउनु पर्ने माग लगातार उठेको थियो । मार्नसको स्थानमा मार्कस स्टोइनिसलाई मौका दिनुपर्ने माग थियो ।

फाइनलमा मार्नस लाबुसेनले एक उत्कृष्ट इनिङ खेले । एक समय ४७-३ को अवस्थाबाट चौथो विकेटका लागि १ सय ९२ रनको साझेदारी गरेका थिए ।

उनले १ सय १० बलमा ४ चौकासहित ५८ रन बनाएका थिए । उनले कुनैपनि समय भारतीय स्पिनरलाई हाबी हुन दिएनन् । साथै हेडलाई खुलेर खेल्ने वातावरण बनाए ।

कमिन्सले फाइनलमा टस जितेर पहिला फिल्डिङ गर्दा पनि धेरै आश्चर्यमा परेका थिए । सुरुवाती दुई हारपछि त्यतैनै आलोचना खेपेका थिए ।

तर बाहिरी आलोचनालाई कहिल्यै ध्यान दिएनन् । आफ्नो टिम, खेलाडी, क्षमता र रणनीतिमा विश्वास राख्नुपर्छ । अनि मात्रै नतिजा आउँछ ।