एजेन्सी – टेस्ट टोली जिम्बाबे आइसिसी टि२० विश्वकप अफ्रिका छनोटमा युगान्डासँग ५ विकेटले पराजित भएकोछ । पहिलो खेलमा नामिबियासँग पराजित भएको जिम्बाबेको विश्वकप छनोट सम्भावना केही कठिन पनि बनेको छ ।

जितको लागि १ सय ३७ रनको विजयी लक्ष्य पछयाएको युगान्डाले १९.१ ओभरमा ५ विकेट गुमाउँदै पूरा गर्यो । युगान्डाको जितमा अलि शाहले २८ बलमा ५ चौका र १ छक्कासहित सर्वाधिक ४२ रन बनाए । अल्पेश रामजानीले २६ बलमा ४ चौका र २ छक्कासहित ४० रन बनाए ।
जिम्बाबेका रिचर्ड नग्वारावाले २ र सन विलियम्सले १ विकेट लिए ।
त्यसअघि युनाइटेड क्रिकेट क्लब विन्डहोकमा टस हारेर पहिला ब्याटिङको निम्तो पाएको जिम्बाबेले निर्धारित २० ओभरमा ७ विकेट गुमाउँदै १ सय ३७ रन बनाएको थियो ।
जिम्बाबेका सिकन्दर राजाले ३९ बलमा २ चौका र ४ छक्कासहित ४८ रन बनाए । ओपनर इनोसेन्ट कैया २३, रयान बर्ल १३ र सन विलियम्सले २१ रन जोडे ।
युगान्डाका दिनेश नाकरानीले ४ ओभरमा १४ रन खर्चेर ३ विकेट लिए । स्सेन्योन्दोले दुई विकेट लिए ।

प्रतियोगितामा ७ टोली छन् । शिर्ष दुई टोलीले २०२४ मा हुने विश्वकप खेल्न पाउनेछन् । केन्या ३ खेलमा ६ अंकका साथ शिर्ष स्थानमा छ । नामिबिया २ खेलमा ४ अंकका साथ दोस्रो स्थानमा छ । युगान्डा ३ खेलमा ४ अंकका साथ तेस्रो स्थानमा छ । जिम्बाबे ३ खेलमा २ अंकका साथ चौथो स्थानमा छ ।