एजेन्सी – घरेलु टोली नामिबियाले आइसिसी टि२० विश्वकप अफ्रिका छनोटमा तान्जानियालाई ५८ रनले हराउँदै विश्वकप २०२४ मा स्थान बनाएकोछ । लगातार पाँचौं जितका साथ तेस्रो पटक विश्वकपमा स्थान बनाएको हो । नामिबियाले यसअघि २०२१ र २०२२ को विश्वकप खेलेको थियो ।

जितको लागि १ सय ५८ रनको विजयी लक्ष्य पछ्याएको तान्जानिया २० ओभरमा ६ विकेट गुमाउँदै ९९ रन बनायो । तान्जानियाका अमल राजिवन ४५ बलमा सर्वाधिक ४१ रन बनाए । नामिबियाका कप्तान जेरार्ड इरास्मसले २ र डेविड विजाले १ विकेट लिए ।

त्यसअघि टस हारेर पहिला ब्याटिङको निम्तो पाएको नामिबियाले २० ओभरमा ६ विकेट गुमाउँदै १ सय ५७ रन बनाएको थियो । नामिबियाका जेजे स्मिथ २५ बलमा १ चौका र ४ छक्कासहित ४० रनमा नट आउट रहे ।

नामिबिया ५ खेलमा ८ अंकका साथ शीर्षस्थानमा छ । नामिबियाले अन्तिम खेल नाइजेरियासँग खेल्नेछ । त्यस खेलअघिनै विश्वकपमा स्थान पक्का गरेको हो ।

अव युगान्डा, केन्या र जिम्बावे मध्य एक टोली विश्वकपमा स्थान बनाउनेछन् । जिम्बावेले नाइजेरिया र केन्यासँग खेल्न बाँकी छ । दुबै खेलमा विजयी भएमा जिम्बावेले विश्वकपमा स्थान बनाउने समिकरण देखिन्छ । जिम्बावे नामिबिया र युगान्डासँग पराजित भएपछि कठिन बनेको थियो ।

७ टोली सहभागी प्रतियोगिता सिंगल राउन्ड रोविनमा हुँदा शीर्ष दुई टोली विश्वकप खेल्न पाउनेछन् । नामिबियाले विश्वकप २०२४ मा स्थान पक्का गरेको हो । अव एक टोलीको टुङ्गो लाग्न बाँकी छ ।

टि२० विश्वकप २०२४ मा अमेरिका र वेस्टइन्डिजमा संयुक्त रुपमा आयोजना हुनेछ । सहभागी २० मध्य १९ टोलीको टुङ्गो लागेको छ ।

अमेरिका, वेस्टइन्डिज, अष्ट्रेलिया, इंग्ल्यान्ड, भारत, नेदरल्यान्ड्स, न्युजिल्यान्ड, पाकिस्तान, दक्षिण अफ्रिका, श्रीलंका, अफगानिस्तान, बंगलादेश, आयरल्यान्ड, स्कटल्यान्ड, पपुवा न्युगिनी, क्यानडा, नेपाल, ओमान र नामिबियाले विश्वकपमा स्थान बनाई सकेका छन् ।