काठमाडौं (हाम्रो खेलकुद) – आक्रामक हिटर सोनु अन्सारी र तीव्र गतिका बलर श्रवण यादवको उत्कृष्ट प्रदर्शनमा कोशी प्रदेशले केपी ओली टि२० प्रतियोगितामा मदन भण्डारी स्पोर्ट्स एकेडेमी ब्ल्यूलाई ९ विकेटले सहजै हराएको छ ।

जितको लागि ६८ रनको विजयी लक्ष्य पछ्याएको कोशीले ७.४ ओभरमा १ विकेट गुमाउँदै पूरा गर्यो । कोशीको जितमा सोनु अन्सारी २२ बलमा ३ चौका र ३ छक्कासहित ३५ रनमा नट आउट रहे । मिनाश थापा ७ बलमा १ चौका र २ छक्कासहित १८ रनमा नट आउट रहे । कप्तान अंकित सुवेदी १७ बलमा २ चौका हान्दै १४ रनमा आउट भए ।

त्यसअघि टस हारेर पहिला ब्याटिङको निम्तो पाएको मदन भण्डारी स्पोर्ट्स १७.५ ओभरमा ६७ रनमा अल आउट भयो । मदन भण्डारीका अर्जुन रायमाझीले २५ बलमा १ चौका र १ छक्कासहित सर्वाधिक २४ रन बनाए । अभय यादव १० बलमा १ चौका र १ छक्कासहित १० रनमा आउट भए ।

कोशीका श्रवण यादवले ३.५ ओभरमा ८ रन खर्चेर ३ विकेट लिए । कमल खत्री र फिर्दोस अन्सारीले २(२ विकेट लिए । सोनु मण्डल, मिनाश थापा र गौरव कटवालले १–१ विकेट लिए ।

समूह डी बाट यसअघि नै आर्मी सेमिफाइनलमा पुगेको थियो । आर्मीले सेमिफाइनलमा बागमती प्रदेशसँग खेल्नेछ । उता मधेश प्रदेशले एपिएफसँग सामाना गर्नेछ । सेमिफाइनल मंसिर १४ र फाइनल १५ मा हुनेछ ।