एजेन्सी – टेस्ट टोली जिम्बावेले २०२४ मा अमेरिका र वेस्टइन्डिजमा संयुक्तरुपमा आयोजना हुने टि२० विश्वकप गुमाउने सम्भावना उच्च छ । नामिबियामा जारी आइसिसी टि२० विश्वकप अफ्रिका छनोटमा सुरुवाती चार मध्य दुई खेलमा हारपछि जिम्बावेको विश्वकप यात्रा निकै कठिन बनेको छ ।

अफ्रिका छनोटबाट नामिबिया लगातार पाँच जितका साथ विश्वकपमा पुगि सकेको छ । अव केन्या, जिम्बावे र युगान्डा मध्य एक टोलीले विश्वकपमा स्थान बनाउनेछन् । दुबै टोलीले समान दुई खेल खेल्न बाँकी छ । युगान्डा ४ खेलमा ३ मा जित र १ मा हारसहित ६ अंकका साथ दोस्रो स्थानमा छ ।

युगान्डाले आज केन्या र विहीबार रवान्डाविरुद्ध खेल्नेछ । युगान्डा दुबै खेलमा विजयी भएको खण्डमा इतिहासमा पहिलो पटक विश्वकप खेल्नेछ । युगान्डा दुबै खेलमा विजयी हुँदा जिम्बावेको विश्वकप खेल्ने सपना समाप्त हुनेछ ।

युगान्डा दुबै खेलमा विजयी हुँदा १० अंक हुनेछ । जिम्बावेले बाँकी दुई खेल जितेको खण्डमा ८ अंक मात्रै हुनेछ । जिम्बावेले आज नाइजेरिया र केन्यासँग खेल्न बाँकी छ । दुबै जितले मात्रै जिम्बावे विश्वकपमा पुग्न सक्दैन । युगान्डाले कम्तिमा एक खेल हारेको खण्डमा मात्रै नेटरनरेटमा माथि रहँदै विश्वकपमा पुग्न सक्छ ।

त्यसैको कारण जिम्बावेको विश्वकप यात्रा निकै कठिन बनेको छ । जिम्बावे पहिलो खेलमा नामिबियासँग ७ विकेटले पराजित हुँदा दोस्रो खेलमा तान्जानियालाई ९ विकेटले हराएको थियो । त्यस्तै युगान्डासँग ५ विकेटले पराजित हुँदा रवान्डालाई १ सय ४४ रनले हराएको थियो । युगान्डासँगको हार जिम्बावेलाई ठूलो भारी पर्न सक्ने अनुमान गरिएको छ ।

युगान्डा पहिलो पटक विश्वकप नजिक

युगान्डाले केन्या र रवान्डालाई हराए सिधैं विश्वकपमा पुग्नेछ । युगान्डाले हालसम्म विश्वकप खेलेको छैन । केन्या र युगान्डाबीच कुल १२ टि२० आई खेल भएका छन् । जसमा युगान्डा ७ खेलमा विजयी भएको छ । रवान्डासँग १६ खेल खेलेको छ । १६ खेलमा नै युगान्डाले जित हात पारेको छ ।

युगान्डाले गत जुनमा अफ्रिका कन्टिनेन्टल कपमा केन्यालाई तीनै खेलमा हराउँदै उपाधि जितेको थियो । पछिल्ला पाँच खेलमा युगान्डा केन्याविरुद्ध ४ खेलमा विजयी भएको छ । त्यसैको कारण युगान्डाको विश्वकप सम्भावना उच्च हुँदा जिम्बावेको निकै कठिन बनेको छ ।