एजेन्सी – नेपालका विकेटकिपर उत्तमथापा मगरले एसिसी यू१९ एसिया कपमा पाकिस्तानविरुद्ध महत्वपूर्ण अर्धशतक प्रहार गरेका छन् । उत्तमले ७० बलमा अर्धशतक प्रहार गरेका हुन् । उनले यसअघि दुई महिना अघि एसिसी यू१९ प्रिमियर कपको फाइनलमा युएईविरुद्ध पनि अर्धशतक हानेका थिए ।

दुबईमा रहेको आइसिसी एकेडेमी ओभल २ मा टस हारेर पहिला ब्याटिङको निम्तो पाएको नेपालले ३९ ओभरमा ८ विकेट गुमाउँदै १ सय ३४ रन बनाएको छ । उत्तम ७१ बलमा ३ चौका र २ छक्कासहित ५१ रनमा क्रिजमा छन् ।

एक समय ४६–५ को अवस्थामा पुगेको नेपाललाई उत्तम र दीपेशले छैटौं विकेटका लागि १ सय बलमा ६८ रनको महत्वपूर्ण साझेदारी गरेका थिए । दीपेश ५९ बलमा २ चौका र १ छक्कासहित ३१ रनमा आउट भए ।

नेपालले ओपनर विपिन रावललाई ७ रनमा गुमाएको थियो । तीव्र गतिका बलर आमिर हसनको तेस्रो ओभरको दोस्रो बलमा विपिन एज लागेर विकेटकिपर साद बेगबाट क्याच आउट हुन पुगेका थिए । अर्का तीव्र गतिका बलर उबेद शाहले आठौं ओभरको चौथो बलमा आकाश त्रिपाठीलाई ६ रनमा एलबीडब्लू आउट गर्दै पाकिस्तानलाई दोस्रो सफलता दिलाएका थिए ।

कप्तान देव खनाल १३ बल खेल्दा खाता खोल्न सकेनन् । मोहम्मद जिशानको १२ औं ओभरको पाँचौं बलमा ठूलो सर्ट खेल्ने धुनमा टप एज लागेर देव अली असफन्दबाट क्याच आउट भएका थिए ।

अर्जुन कुमाल ३७ बलमा ३ चौकासहित २१ रनमा क्याच आउट भए । तीव्र गतिका बलर मोहम्मद जिशानको १६ औं ओभरको अन्तिम बलमा अर्जुन एज लागेर विकेटकिपर साद बेगबाट क्याच आउट भए । अग्ला कदका जिशानको बलमा अर्जुन आउट भएसँगै गुलशन झा ब्याटिङका लागि आएका थिए ।

गुलशन स्पिनर अली असफन्दको १७ औं ओभरको अन्तिम बलमा बोल्ड आउट भए । सिनियर टोलीबाट खेली सकेका गुलशनले ४ बल खेल्दा १ रन बनाए । गुलशन आउटसँगै नेपाल समस्यामा थियो ।

विशाल विक्रम केसी ९ बलमा १ रन बनाउँदै क्याच आउट भए । पाकिस्तानका तीव्र गतिका बलर मोहम्मद जिशानले ५ विकेट लिएका छन् ।