काठमाडौं (हाम्रो खेलकुद) – चितवन जिल्ला क्रिकेट संघको आयोजनामा चार जिल्ला सम्मिलित भिजिट भरतपुर २०२४ टि२० क्रिकेट सिरिज हुने भएको छ।

जिल्ला क्रिकेट संघ चितवनले नारायणगढमा पत्रकार सम्मेलन गरी निर्माणाधिन गौतम बुद्ध अन्तर्राष्ट्रिय क्रिकेट रंगशालाको नमुना मैदानमा मंसिर २४ देखी २७ गतेसम्म प्रतियोगिता आयोजना गर्ने जानकारी दिएको हो ।

प्रतियोगितामा चितवन, नवलपुर, मकवानपुर र पर्सा गरी ४ टोलीको सहभागीता रहनेछ । प्रतियोगिता सिङ्गल राउन्ड लिगका आधारमा खेलाइनेछ ।

अंकतालिकाको शीर्ष दुई टोलीले फाइनलमा प्रतिस्पर्धा गर्नेछन् । विजेता र उपविजेता टोलीलाई ट्रफी, मेडल र प्रमाण(पत्रको व्यवस्था गरिएको संघका अध्यक्ष सुदिप पियाले जानकारी दिए । यो प्रतियोगितालाई आगामी दिनहरुमा पनि चारवटा जिल्ला मिलेर नै आयोजना गर्दै लैजाने योजना रहेको पियाले बताए ।

साथै, चितवन जिल्ला क्रिकेट संघको नयाँ कार्यसमिती चयन भएपछि हालसम्म गरेका कार्यहरुका बारेमा समेत जानकारी गराइएको थियो । क्याम्पाचौरको नेट मर्मत सम्भार, विभिन्न नगर प्रमुखहरुसंग क्रिकेट संरचना बिस्तार गर्ने बारेमा छलफल, बालबालिकालाई क्रिकेटमा आकर्षित गर्न हरेक शनिबार क्याम्प संचालन लगायतका गतिविधीहरु गरिएको संघले जनाएको छ ।