काठमाडौं (हाम्रो खेलकुद) – जिल्ला स्तरीय महिला क्रिकेट छनोट प्रतियोगिताको उपाधी राजबिराज च्याम्पसले खडक क्विनलाई ६ विकेटले पराजित गर्दै जितेको छ । टस हारेर ब्याटिङको निम्तो पाएको खडकले निर्धारित २० ओभरको खेलमा ७ विकेट गुमाउँदै ९५ रन बनाएको थियो । खडकका लागि मन्जु रामले १५ रनको योगदान दिइन् ।

राजबिराजका साक्षी यादवले ४ ओभरमा १७ रन दिई ३ विकेट लिइन् । आकृति मण्डलले २ तथा दिपा राम र सितल चौधरीले सामान १ लिन सफल भइन् ।

जितका लागि ९६ रनको झिनो विजयी लक्ष्य पछ्याएको राजबिराज १७.४ ओभरमा ४ विकेट गुमाउँदै पूरा गर्यो । राजबिराजलाई सहज जित दिलाउन कप्तान साक्षी यादवले ३४ बलमा ७ चौक्काको मद्धतले ४० रनको योगदान दिइन् । निशु चौधरीले १७ रनको योगदान दिइन् । खडकका मन्जु राम र सन्तोषि चौधरीले १-१ विकेट लिइन् ।

खेलको म्यान अफ द म्याच राजबिराजकी साक्षी यादव भइन् । प्रतियोगिताको उत्कृष्ट ब्याटर खडक क्वीनका अन्जली चौधरी, उत्कृष्ट बलर राजबिराज च्याम्पसका दिपा राम र प्लेयर अफ द सिरिज साक्षी भईन् । साक्षी नेपाली क्रिकेट टोलीका युवा अलराउन्डर विवेक यादवकी बहिनी हुन् ।

विजेता खेलाडिलाई सप्तरी क्रिकेट संघका अध्यक्ष आयुश श्रेष्ठ, खडक नगरपालिकामा नगर प्रमुख जयप्रकाश चौधरी, सबल नेपालका सिनियर म्यानेजर अशोक शाह, परमेश्वर झा, नेपाली राष्ट्रिय टिमका प्रमुख छनौटकर्ता दिपेन्द्र चौधरी र आईसिसि ट्युटर सारा बेगले पुरस्कार बित्तरण गरेका थिए ।

सबल नेपालको मुख्य आयोजना तथा सप्तरी क्रिकेट संघको समन्वयमा राजबिराज स्थित पबिमाबिको क्रिकेट मैदानमा पाँचौ महिनावारी दिवसको अवसरमा उक्त सिरिज आयोजना गरिएको थियो । यसै सिरिजको प्रदर्शनबाट मधेश प्रदेश छनोट खेल्ने टिम घोषणा गरेको छ ।