एजेन्सी – विष्फोटक ब्याटिङ अलराउन्डर आन्द्रे रसेल वेस्टइन्डिजको टोलीमा दुई वर्षपछि फर्किएका छन् । घरेलु टोली वेस्टइन्डिजले इंग्ल्यान्डसँग खेल्ने पाँच टि२० आई खेलको सिरिजको लागि रसेललाई टोलीमा बोलाएको हो ।

आगामी वर्ष अमेरिका र वेस्टइन्डिजमा हुने टि२० विश्वकपलाई ध्यानमा वेस्टइन्डिजले टोली बोलाएको छ । यसअघि वेस्टइन्डिजका पूर्व मुख्य प्रशिक्षक फिल सिमन्ससँग राम्रो सम्बन्ध नहुँदा २०२१ र २०२२ को टि२० विश्वकप बाहिर भएका थिए । तर पूर्व कप्तान ड्यारेन स्यामी आएपछि उनले रसेललाई टोलीमा फर्काउने निर्णय लिएका हुन् ।

रसेलको आगामनले वेस्टइन्डिजको ब्याटिङ मजबुत बन्नेछ । वेस्टइन्डिजको टोलीमा रसेल, निकोलस पुरन, शिम्रन हेटमायर र कायल मेयर्स जस्ता विष्फोटक ब्याटर टोलीमा छन् ।

गत जुनमा जिम्बावेमा सम्पन्न एकदिवसीय विश्वकपपछि विदेशी फ्रेन्चाइज लिग खेल्दै आएका निकोलस पुरन पनि टोलीमा फर्किएका छन् । टोलीको कप्तान रोभम्यान पावेल र उपकप्तानमा शाई होप छन् । इंग्ल्यान्ड र वेस्टइन्डिजबीचको सिरिज डिसेम्बर १३, १४, १६, २० र २२ मा हुनेछ । तीन ओडिआई खेलको सिरिज वेस्टइन्डिजले २-१ ले जितेको थियो ।

वेस्टइन्डिजको टोली :

रोभम्यान पावेल(कप्तान), शाई होप(उपकप्तान), रोश्टन चेश, म्याथ्यु फर्ड, शिम्रन हेमायर, जेसन होल्डर, अकिल हुसेन, अल्जारी जोशेफ, ब्रेन्डन किंग, काइल मेयर्स, गुडाकेश मोती, निकोलस पुरन, आन्द्रे रसेल, शेर्फान रदरफोर्ड र रोमारियो शेफर्ड ।