काठमाडौं (हाम्रो खेलकुद) – नेपाली क्रिकेट टोलीकी अनुभवी स्पिनर करुणा भण्डारी १८ महिनापछि आज खेल खेल्दैछिन् । बागमती प्रदेशसँगको तीन टि२० सिरिजको पहिलो खेलमा करुणा खेल्दैछिन् । तल्लोमुलपानी क्रिकेट मैदानमा भएको टसमा बागमती प्रदेशकी कप्तान कन्चन श्रेष्ठले टस जितेर पहिला फिल्डिङ गर्ने निर्णय लिएकी छिन् ।

करुणा एपिएफको प्लेइङ ११ मा छिन् । करुणा २०२२ जुनपछि पहिलो पटक खेल्न लागेकी हुन् । करुणाको दायाँ खुट्टाको असिएल टिअर चोटको कारण पुरानो बानेश्वरमा रहेको फ्रन्टलाइन अस्पतालमा शल्यक्रिया भएको थियो । त्यसपछि उनी एक वर्ष मैदान बाहिर रहेकी थिइन् ।

पछिल्लो समय लगातार अभ्यास गरेपनि खेल भने खेल्न पाएकी थिइनन् । घरेलु क्रिकेट नहुँदा अभ्यासमा सिमित थिइन् । करुणाको आगमनले एपिएफको बलिङ मजबुत बन्नेछ । उता बागमतीका दुई खेलाडी अश्मिना कर्माचार्य र सोनी पाख्रिन चोटका कारण आजको खेल खेल्नेछैनन् ।

बागमती प्रदेश संघले प्रधानमन्त्री कप टि२० महिला राष्ट्रिय प्रतियोगिता अघि एपिएफसँग अन्तिम तयारी गरेको हो ।

एपिएफको टोली :

सीता रानामगर (कप्तान), ममता चौधरी, इन्दु बर्मा, रोमा थापा, सीता मगर, नेरी थापा, मन्जु बोगटी, करुणा भण्डारी, बिनु बढामगर, सोनु खड्का, रेखा रावल, सुष्मा श्रेष्ठ, निशा भट्ट र राजमति ऐरी ।