एजेन्सी – घरेलु टोली युएईले एसिसी यू१९ एसिया कपमा जापानलाई १ सय ७ रनले हराउँदै सेमिफाइनलमा स्थान बनाएको छ । युएई आफ्नो क्रिकेट इतिहासमा पहिलो पटक यू१९ एसिया कपको सेमिफाइनलमा पुगेको हो । टेस्ट टोली श्रीलंकालाई पछि पार्दै सेमिफाइनलमा स्थान बनाएको हो ।

जितको लागि ३ सय २१ रनको विजयी लक्ष्य पछ्याएको जापानले ५० ओभरमा ४ विकेट गुमाउँदै २ सय १३ रन बनायो । जापानका कप्तान कोजी एबीले ६८ बलमा ५ चौका र २ छक्कासहित सर्वाधिक ६९ रन बनाए ।

त्यस्तै चाल्र्स हिन्जा ३६ बलमा ५ चौकासहित ४० रनमा आउट हुँदा किफेर लेक २७ बलमा ५ चौकासहित ३१ रनमा अविजित रहिन् । युएईका हश्रित सेठले दुई, आयन खान र ध्रुब परेशारले १-१ विकेट लिए ।

त्यसअघि टस जितेर पहिला ब्याटिङ रोजेको युएईले निर्धारित ५० ओभरमा ७ विकेट गुमाउँदै ३ सय २० रन बनाएका थियो । युएईका आयन खानले ४१ बलमा ६ चौका र ३ छक्कासहित सर्वाधिक ६७ रनमा नट आउट रहे । ध्रुब परेशार ६५, मरुफ मेरचान्ट ६० र तनिश सुरी ४३ रनमा आउट भए । जापानका आराव तिवारी र चाल्र्स हिन्जाले २–२ विकेट लिए ।

समूह बी बाट युएई ३ खेलमा २ मा जित र १ मा हारसहित ४ अंकका साथ दोस्रो स्थानमा रह्यो । युएईले समूह ए को विजेता पाकिस्तानसँग शुक्रबार सेमिफाइनल खेल्नेछ । समूह बी मा ३ खेलमा अपराजित रहँदै बंगलादेश शीर्षस्थानमा रह्यो । बंगलादेशले शुक्रबार नै समूह ए को उपविजेता भारतसँग खेल्नेछ ।

नेपाल भने समूह ए मा तीन खेलमा नै पराजित हुँदै बाहिरिएको थियो । श्रीलंका ३ खेलमा २ अंकका साथ तेस्रो स्थानमा रहेर बाहिरियो ।