एजेन्सी – युएईले एसिसी यू१९ एसिया कपको फाइनलमा आज उपाधिको लागि बंगलादेशसँग खेल्दैछ । खेल नेपाली समय अनुसार बिहान ११ : १५ मा दुबई इन्टरनेशल क्रिकेट स्टेडियममा सुरु हुनेछ । दुबै टोली पहिलो पटक उपाधि जित्ने सोचमा हुनेछन् ।

युएईले सेमिफाइनलमा पाकिस्तानलाई ११ रन तथा बंगलादेशले भारतलाई ४ विकेटले हराउँदै फाइनलमा पुगेका हुन् । युएई पहिलो पटक र बंगलादेश दोस्रो पटक फाइनल खेलेका हुन् । दुबै टोलीले हालसम्म एसिया कपको उपाधि जितेका छैनन् । युएई घरेलु मैदानको भरपूर्ण फाइदा उठाउँदै उपाधि जित्न चाहन्छ ।

युएईको टोलीमा आयन खान, अर्यांश शर्मा र एथान डि सोल्झा सिनियर टोलीबाट खेलेका खेलाडी हुन् । युएईलाई फाइनलमा पुर्याउन कप्तान आयन खानको प्रदर्शन निकै महत्वपूर्ण छ ।

आजको खेलमा पनि युएई उनीबाट अलराउन्ड प्रदर्शन चाहन्छ । अर्यांश शर्माले ओपनिङका साथ राम्रो प्रदर्शन गर्दै आएका छन् । युवा विकेटकिपर तानिश सुरीले श्रीलंकाविरुद्ध ७५ रन बनाएका थिए । यस प्रतियोगितामा राम्रो प्रदर्शन गरेका छन् ।

उता भारतलाई हराउन अरिफुल इस्लामले ९४ रनको सानदार इनिङ खेलेका थिए । उनी बंगलादेशका प्रमुख हतियार हुन् । समूह चरणमा युएई बंगलादेशसँग ६१ रनले पराजित भएको थियो । युएईले बंगलादेशलाई २ सय २८ रनमा अल आउट गरेपनि उक्त लक्ष्य पूरा गर्न सकेको थिएन ।

उक्त खेलमा बंगलादेशका ओपनर आशिकुर रहमान शिब्लीले ७१ रन बनाएका थिए । युएईका अलराउन्डर ध्रुब पराशारले ६ विकेट लिएका थिए ।

युएईका युवा अलराउन्डर ध्रुब गत वर्ष यू१९ विश्वकप एसिया क्षेत्र छनोटका सर्वोत्कृष्ट खेलाडी समेत हुन् । नेपाल भने समूह ए मा भारत, पाकिस्तान र अफगानिस्तान तीनै टोलीसँग पराजित हुँदै बाहिरिएको थियो ।