एजेन्सी – इन्डियन प्रिमियर लिग (आइपिएल) २०२४ को अक्सन मंगलबार दुबईमा हुँदैछ । अक्सनको लागि भारतीय क्रिकेट बोर्डले सष्ट लिष्टमा परेका ३ सय ३३ खेलाडीको नाम सार्वजनिक गरेको छ । एसोसिएटबाट नामिबियाका डेविड विजा र नेदरल्यान्ड्सका पाउल भान मार्केन मात्रै छन् ।

नेपालका खेलाडीले आइपिएलमा नाम दर्ता गराए पनि सर्ट लिष्टमा पर्न सकेनन् । तर अझै पनि नेपाली खेलाडी आइपिएलको अक्सनमा भने पर्न सक्ने सम्भावना बाँकी छ ।

तर त्यसको लागि कुनै फ्रेन्चाइज टोलीले बिसिसिआईलाई आग्रह गर्नुपर्छ । आफूले किन्न चाहेको खेलाडी सर्ट लिष्टमा छुटेको खण्डमा फ्रेन्चाइज टोलीले बिसिसिआईलाई आग्रह गरेर राख्न सक्छन् । नेपाली खेलाडी अक्सनमा जान कुनै फ्रेन्चाइज टोलीले नाम सिफारिश गर्नुपर्ने हुन्छ ।

नेपालका स्पिनर सन्दीप लामिछाने २०१८ को आइपिएल अक्सनमा सुरुवाती नाम नै दर्ता गराएका थिएनन् । तर तत्कालिन दिल्ली डेयर डेभिल्स (दिल्ली क्यापिटल्स) को आग्रहमा सन्दीप आइपिएलको अक्सनमा राखिएको थियो ।

त्यो समय नेपाल क्रिकेट संघ (क्यान) आइसिसीको निलम्बनमा थियो । सन्दीपले आफ्नो म्यानेजर मार्फत दर्ता गराउन खोजेका थिए । तर आइपिएलमा नाम दर्ता सम्बन्धित क्रिकेट बोर्ड मार्फत मात्रै हुने गर्दछ । त्यसैको कारण सन्दीपको नाम सुरुवातमा दर्ता भएको थिएन ।

त्यो समय २०१८ को आइपिएलमा कुल ११ सय २२ खेलाडीले नाम दर्ता गराउँदा सन्दीप परेका थिएनन् । तर सन्दीप सर्ट लिष्ट ५ सय ७८ मा परेका थिए ।

सन्दीपलाई अक्सनमा दिल्लीले २० लाख भारुमा किनेको थियो । सन्दीप २०२० सम्म दिल्लीमा रहेका थिए । २०२० पछि भने दिल्लीले उनलाई फुकुवा गरेको थियो । त्यसपछि सन्दीपलाई अक्सनमा कुनैपनि टोलीले मूल्य लगाएका छैनन् ।

आगामी आइपिएल अक्सनमा नेपालबाट दीपेन्द्रसिंह ऐरी, सन्दीप लामिछाने र कुशल मल्ल लगायतका केहि खेलाडी बिक्न सक्ने सम्भावना छ ।

पछिल्लो एक वर्षमा नेपालले अन्तर्राष्ट्रिय क्रिकेटमा सानदार प्रदर्शन गरेको हुँदा आइपिएल सम्भावना पनि बढेको हो । एसिसी इमर्जिङ टिम्स एसिया कप, एसिया कप र १९ औं एसियाली खेलकुदमा नेपालले यस वर्ष भारतविरुद्ध खेल्दै राम्रो प्रदर्शन गरेको हुँदा नेपाली खेलाडीको आइपिएलमा बिक्ने सम्भावनाको आशा बढेको हो ।