काठमाडौं (हाम्रो खेलकुद) – प्रधानमन्त्री कप महिला टि२० राष्ट्रिय प्रतियोगिता बिहीबार देखी काठमाडौंमा सुरु हुँदैछ । पहिलो पटक क्यानले पिएमकप महिला राउन्ड रोविनको आधारमा गर्दैछ ।

पहिलो पटक राउन्ड रोविनमा खेल्न पाएपछि सबै खेलाडी उत्साहित भएका छन् । सबै कप्तानले क्यानलाई धन्यावाद दिँदै राउन्ड रोविनमा खेल्न पाउँदा खुसी ब्यक्त गरेका छन् । पिएमकप अघि सबै ८ टोलीका कप्तानहरुको भनाइ यस प्रकार छ ।

कोशी प्रदेशकी कप्तान रुविना क्षेत्री बेलबासले युवा खेलाडीलाई राम्रो गर्ने अवसर भएको बताएकी छिन् ।

‘यो राउन्ड रोबिन हुँदा धेरै जनाले अवसर पाउने छन् । क्यानलाई खेलाडीको तर्फबाट धन्यावाद भन्न चाहन्छु । नयाँ तरिका र सोचबाट महिला क्रिकेट पनि विकास गर्ने भनेर सबै जनाले सोच्नु भएको छ । त्यसको लागि धेरै धेरै धन्यावाद । अरु खेलाडीलाई पनि राम्रो अवसर हो । पहिला एउउटा दुई वटा खेल खेलेर समेमिफाइनल खेल्नु पर्दथ्यो । अहिले ७ खेल खेल्न पाउनुनेछ । हाम्रो टिमको तयारी जिल्ला र प्रदेश छनोट देखीनै राम्रो तरिकाले खेल्ने भनेर तयारी गरेका छौं’, रुविना क्षेत्रीले भनिन् ।

मधेश प्रदेशकी कप्तान कविता गौतमले पनि क्यानलाई धन्यावाद दिइन् ।

‘पहिलो पटक राउन्ड रोविनमा हुँदा खुसी छौ । हामीले पनि पहिलो पटक यति लामो प्रतियोगिता खेल्दै छौं । यसले अव नयाँ आउने पिडि र खेलेर एक दुई खेलमा नचल्दा मनोबल कमजोर हुँदै अव खेल्दिन भन्नेहरुको लागि राम्रो अवसर हो । सबैले आफ्नो प्रदर्शन देखाउन सक्छन् । खुसी लागेको छ । क्यानलाई मेरो र खेलाडीतर्फबाट धन्यावाद छ । मधेशको टोली राम्रोछ । पहिला भन्दा राम्रो भएर आएका छौं । दुई नयाँ खेलाडी हुँदा टिममा उत्साह र आत्माविश्वास बढेको छ । यो प्रतियोगितासँगै हाम्रो टोलीले पनि नयाँ इतिहास राख्ने छ’, कविताले भनिन् ।

उता बागमती प्रदेशकी कप्तान अश्मिना कर्माचार्यले यस प्रतियोगिताको लागि एक महिना देखी तयारी गरेको बताइन् ।

‘यस प्रतियोगिताको लागि पछिल्लो एक महिना देखी राम्रो तयारी भएको छ । पहिला हाम्रो जिल्ला, प्रदेश, इलिट ट्रफी हुँदै नेपाल एपिएफ क्लबसँग सिरिज भयो । हामी फरक स्तरको प्रतियोगिता भयो । एक्सपोजर धेरै भयो । त्यो अनुभवलाई कसरी सदुपयोग गर्ने भनेर आएका छौं’, अस्मिनाले भनिन् ।

गण्डकी प्रदेशकी कप्तान कुसुम गोदारले टोलीले राम्रो अभ्यास गरेको बताएकी छिन् ।

‘पहिला कुरा क्यानलाई धन्यावाद । पहिला एउटा दुई वटा खेल खेल्न पाउँथ्यौं । अहिले ७ टोलीसँग खेल्न पाउँछौं । टिमको अभ्यास राम्रो भएकोछ । नयाँ नयाँ खेलाडी पनि टोलीमा छन्’, कुसुमले भनिन् ।

लुम्बिनी प्रदेशकी कप्तान सरस्वती जिएमले यसअघि थोरै खेल हुँदा खेलाडी खुलेर खेल्न नसक्ने समस्या रहेको बताइन् ।

‘म पहिला हृदयदेखी क्यानलाई धन्यावाद दिन चाहन्छु । पहिला थोरै खेल हुँदा सबै खेलाडी खुलेर खेल्न सक्ने थिएनन् । यस पटक राम्रो हुने आशा छ । टोलीका एक दुई जना राम्रो बहिनीहरु छन् । उनीहरुलाई राम्रो हुन्छ । हाम्रो तयारी राम्रो हुँदा आशा गरौं नतिजा राम्रो आउछ’, सरस्वतीले भनिन् ।

उता कर्णालीकी कप्तान किरण कुँवरले टिम राम्रो भएको बताइन् ।

‘सब भन्दा पहिला क्यानलाई धन्यावाद भन्न चाहन्छु । यति धेरै खेल राख्दिनु भएको छ । हाम्रो टिम राम्रो भएको छ’, किरणले भनिन् ।

सुदूरपश्चिमकी कप्तान ऋतु कनौजियाले तयारी राम्रो भएको बताइन् ।

‘राउन्ड रोबिनको खेल गराएकोमा क्यानलाई धन्यावाद । हाम्रो पनि तीन चार जना राम्रो खेलाडी छन् । तयारी गरेका छन्’, ऋतुले भनिन् ।

उपाधिको प्रमुख दाबेदार एपिएफकी कप्तान सीता रानामगरले तयारी राम्रो भएको बताइन् । ‘

हामीले तयारी राम्रो गरेका छौं । सर्वप्रथम क्यानलाई धन्यावाद भन्न चाहन्छु । पहिलो पटक यति धेरै खेल खेल्ने अवसर पाएका छौं । नयाँ खेलाडीले अवसर यस पटक धेरै पाउँछन्’, सीताले भनिन् ।