काठमाडौं (हाम्रो खेलकुद) – नेपाल एपिएफ क्लबले साविक विजेता सुदूरपश्चिम प्रदेशमाथि ९ विकेटको सानदार जितका साथ प्रधानमन्त्री कप महिला टि२० राष्ट्रिय प्रतियोगितामा विजयी सुरुवात गरेको छ ।

जितको लागि ८८ रनको विजयी लक्ष्य पछ्याएको एपिएफले १६.१ ओभरमा १ विकेट गुमाउँदै पूरा गर्यो । एपिएफको जितमा ओपनर ज्योति पाण्डेले ४८ बलमा ९ चौकासहित सर्वाधिक ४९ रन बनाइन् ।

इन्दु बर्माले ४४ बलमा ४ चौकासहित ३१ रनमा अविजित रहिन् । ओपनर सीता रानामगर ४ रनमा आउट भएकी थिइन् । सुदूरको लागि ईश्वरी विष्टले एक विकेट लिइन् ।

त्यसअघि माथिल्लो मुलपानी क्रिकेट मैदानमा टस जितेर पहिला ब्याटिङ रोजेको सुदूरपश्चिमले निर्धारित २० ओभरमा ९ विकेट गुमाउँदै ८७ रन बनायो ।

सुदूरको लागि कविता जोशीले २७ बलमा २ चौका र १ छक्कासहित सर्वाधिक २२ रन बनाइन् । सम्झना खड्का १२ रनमा आउट हुँदा अन्यले दोहोरो अंकमा रन बनाउन सकेनन् ।

एपिएफको लागि सोनु खड्काले ४ ओभरमा २४ रन खर्चेर २ विकेट लिइन् । सुमन विष्ट, करुणा भण्डारी र इन्दु बर्माले १(१ विकेट लिइन् ।

आजको पहिलो खेलमा बागमती प्रदेशले मधेशलाई २८ रनले हरायो । आजको दोस्रो खेलमा टियुमा गण्डकी र लुम्बिनीबीच प्रतिस्पर्धा हुँदैछ । अर्को खेलमा मुलपानीमा कोशी र कर्णालीबीच प्रतिस्पर्धा हुनेछ ।