काठमाडौं (हाम्रो खेलकुद – कप्तान सरस्वती घर्तीमगरको अर्धशतकमा लुम्बिनी प्रदेशले प्रधानमन्त्री कप महिला टि२० राष्ट्रिय प्रतियोगितामा कर्णाली प्रदेशलाई ३० रनले हराएको छ । लुम्बिनीले जित निकाल्दा कर्णालीको लगातार चौथो हार हो ।

जितको लागि १ सय ३४ रनको बलियो विजयी लक्ष्य पछ्याएको कर्णालीले निर्धारित २० ओभरमा ७ विकेट गुमाउँदै १ सय ३ रन बनायो । कर्णालीको लागि मध्यक्रमकी ब्याटर गौरी बोहराले २२ बलमा २ चौकासहित सर्वाधिक २२ रन बनाइन् ।

यमुना थारु २९ बलमा ४ चौकासहित २१, तृर्सना विश्वकर्मा ८, कप्तान किरण कुँवर २, निकिता धमला शून्य र बिना थापा ४ रनमा आउट भइन् । अन्जु गुरुङ ६ बलमा ३ चौकासहित १३ र रश्मी खड्का ११ रनमा नट आउट रहिन् ।

लुम्बिनीकी सरस्वती पुनले ४ ओभरमा १५ रन खर्चेर २ विकेट लिइन् । कृतिका मरासिनीले ४ ओभरमा १७ रन खर्चेर २ विकेट लिइन् । शर्मिला रोका र चमेली चौधरीले १-१ विकेट लिइन् ।

त्यसअघि टस हारेर पहिला ब्याटिङको निम्तो पाएको लुम्बिनी प्रदेशले निर्धारित २० ओभरमा ५ विकेट गुमाउँदै १ सय ३३ रन बनायो । लुम्बिनी प्रदेशकी कप्तान सरस्वती जिएम ६२ बलमा ७ चौकासहित ५३ रनमा अविजित रहिन् । ओपनर लक्ष्मी चौधरी ४ रनमा यमुना थारुको तेस्रो बलमै आउट भएकी थिइन् ।

दोस्रो विकेटका लागि आश्मा पुलामी मगर र सरस्वती जिएमले ४४ रनको साझेदारी गरेका थिए । आम्शा रश्मी खड्काको बलमा २५ बलमा ३ चौकासहित २५ रनमा बोल्ड भइन् ।

चमेली चौधरीले २२ बलमा २ चौकासहित १८, सरस्वती पुन ३ र मधु डिसीले २ रन बनाइन् । कर्णालीको लागि यमुना थारु, रश्मी खड्का र तृर्सना विश्वकर्माले १–१ विकेट लिइन् ।

कर्णालीको यो लगातार चौथो हार हो । कर्णाली यसअघि कोशीसँग १० विकेट, गण्डकीसँग ४४ रन र सुदूरपश्चिमसँग ८१ रनले पराजित भएको थियो । उता लुम्बिनीको दोस्रो जित हो । लुम्बिनी पहिलो खेलमा गण्डकीलाई ४ विकेटले हराएको थियो । सुदूरसँग ९ विकेट र एपिएफसँग ९० रनले पराजित भएको थियो ।