काठमाडौं (हाम्रो खेलकुद) – स्पिनर साहब आलमको अलराउन्ड प्रदर्शनमा त्रिभुवन आर्मी क्लबले प्रो क्लब टि२० च्याम्पियनसिपमा भारतीय टोली उत्तर प्रदेश क्लब-११ माथि ६५ रनको सानदार जित हात पारेको छ । लगातार चौथो जितका साथ आर्मीले सेमिफाइनल स्थान पक्का गरेको छ ।

जितको लागि १ सय ३३ रनको मध्यम विजयी लक्ष्य पछ्याएको उत्तर प्रदेश १४.३ ओभरमा ६७ रनमा अल आउट भयो । उत्तरप्रदेशका अलत्माश आलमले २१ बलमा १ चौका र १ छक्कासहित सर्वाधिक १६ रन बनाए । तरुन कुमार १२, जयदेव सिंह र शुभम चौधरीले ११–११ रन बनाए ।

आर्मीका पवन कार्कीले २ ओभरमा १ मेडनसहित ३ रन खर्चेर ३ विकेट लिए । साहब आलमले ४ ओभरमा २५ रन खर्चेर ३ विकेट लिए । बसिर अहमद र सोमपाल कामीले २-२ विकेट लिए ।

त्यसअघि नारायणी क्रिकेट ग्राउन्ड बिरगंजमा टस जितेर पहिला ब्याटिङ रोजेको आर्मी १९.५ ओभरमा १ सय ३२ रनमा अल आउट भएको थियो । आर्मीका ओपनर सन्तोष कार्कीले ३२ बलमा ४ चौका र ३ छक्कासहित ४४ रनमा आउट भए । विनोद भण्डारी ५, बसिर अहमद १४, भीम सार्की २३, साहब आलम २२, कुशल मल्ल र रोहित पौडेल शून्यमा आउट भए ।

वाशी अन्सारीले ४ ओभरमा १ मेडनसहित १० रन खर्चेर ३ विकेट लिए । शैम हसन र शाहन्शाह अहमदले समान दुई विकेट लिए । तारुन कुमार र भीम शर्माले १–१ विकेट लिए । प्रतियोगितामा नेपालका तीन विभागीय, पर्सासँगै भारतीय दुई क्लबको सहभागीता छ । शीर्ष चार टोली सेमिफाइनल खेल्नेछन् ।