विनोद सिंह विष्ट/बैतडी

बैतडीमा जारी प्रधानमन्त्री कप एकदिवसीय राष्ट्रिय क्रिकेट प्रतियोगिता अन्तर्गत सुदूरपश्चिम प्रदेशस्तरीय छनौटमा डोटीले दार्चुलालाई ८ विकेटले पराजित गरेको छ ।

जितका लागि पछ्याएको ८२ रनको सामान्य लक्ष्य डोटीले १७ ओभरमा २ विकेटको क्षतिमा पूरा गर्यो । डोटीको जितमा हृदय विठारीले अविजित २७ र अनुराग सिंहले २० बनाए ।हृदय म्यान अफ द म्याच चुनिए । दार्चुलाका विरेन बमले २ विकेट लिएका थिए ।

त्यसअघि दशरथचन्द क्रिकेट मैदान सुन्दरखालीमा टस जितेर ब्याटिङ रोजेको दार्चुला ३०.४ ओभरमा ८१ रनमा अल आउट भएको थियो । दार्चुलाका विपिन धामीले सर्वाधिक १६ रन बनाए । डोटीका सुर्य श्रेष्ठ र आयुस द्वारियाले ३र३ विकेट लिए ।

यो जितले डोटीको इलिट च्याम्पियनसिपमा छनोट हुने सम्भावना कायमै छ । दोस्रो खेलमा पराजित भएपछि दार्चुलाको सम्भावना लगभग सकिएकोछ ।

मंगलबार बझाङ र दार्चुला भिड्नेछन् । सुदूरपश्चिम प्रादेशिक क्रिकेट संघको आयोजना तथा बैतडी जिल्ला क्रिकेट संघको सहआयोजनामा पुस ८ गतेदेखि प्रतियोगिता सञ्चालन भएको हो।

प्रादेशिक क्रिकेट संघले यस वर्षदेखि दुई चरणमा प्रदेश छनोट गरेको छ । पहिलो चरणमा बैतडीमा प्लेट च्याम्पियनसिपमा दार्चुला,बझाङ,डडेल्धुरा र डोटी छन् ।

जसको विजेताले ईलिट च्याम्पियनसिपमा बैतडी,कैलाली,कञ्चनपुर र अछामसँग खेल्न पाउनेछ । गत वर्षको प्रदेश छनोटमा सेमिफाइनल पुगेका टोलीले सोझै ईलिट च्याम्पियनसिप र सेमिफाइनलमा नपुगेका टोलीले प्लेट च्याम्पियनसिप खेल्न लागेका हुन्।