काठमाडौं(हाम्रो खेलकुद) – नेपाल पुलिस क्लबले प्रो क्लब च्याम्पियनसिपको दोस्रो सेमिफाइनल खेलमा वोन्डर्स क्लब नोयडामाथि ४ रनको रोमान्चक जित हात पार्दै फाइनलमा पुगेको छ ।

जितको लागि १ सय १३ रनको लक्ष्य पछ्याएको नोयडाले २० ओभरमा ९ विकेट गुमाउँदै १ सय ८ रन बनायो । नोयडाका भान्स बेदीले ४० बलमा ३ चौका र २ छक्कासहित सर्वाधिक ४३ रन बनाए ।

पुलिसका स्पिनर सागर ढकालले ४ ओभरमा १ मेडनसहित १७ रन खर्चेर ३ विकेट लिए । राशिद खानले ४ ओभरमा २४ रन खर्चेर २ विकेट लिए । ललित राजवंशी र शेर मल्लले १-१ विकेट लिए ।

त्यसअघि नारायणी क्रिकेट ग्राउन्ड बिरगंजमा टस हारेर पहिला ब्याटिङको निम्तो पाएको पुलिसले निर्धारित २० ओभरमा ७ विकेट गुमाउँदै १ सय १२ रन बनायो ।

पुलिसका अर्जुन साउदले ३५ बलमा ३ चौका र १ छक्कासहित सर्वाधिक ४२ रनको योगदान दिए । सुनिल धमलाले ४५ बलमा १ चौका र १ छक्कासहित ३४, दीलिप नाथ १०, कप्तान आरिफ शेख ४ र करण केसीले ५ रन बनाए ।

नोयडाका अलिप गुप्ताले सर्वाधिक दुई विकेट लिए । पहिलो सेमिफाइनल खेलमा पर्साले त्रिभुवन आर्मी क्लबलाई ३१ रनले हराएको थियो । पुलिस र पर्साबीचको फाइनल शनिबार हुनेछ ।