विनोद सिंह विष्ट, बैतडी

बैतडीमा सुरु प्रधानमन्त्री कप पुरूष एकदिवसीय राष्ट्रिय क्रिकेट प्रतियोगिताको सुदूरपश्चिम प्रदेशस्तरीय छनोट अन्तर्गत इलाइट च्याम्पियनसिपको खेलमा बैतडीले विजयी शुरूवात गरेको छ।। बैतडीले बझाङमाथि १ सय ८१ रनको विशाल जित निकाल्यो ।

जितका लागि पाएको २ सय ८१ रनको विशाल विजयी लक्ष्य पछ्याएको बझाङ १७.५ ओभरमा ९९ रनमा अल आउट भयो। उसका सनम बुढाथोकीले सर्वाधिक २६ रन बनाए। बैतडीका कप्तान रिसिकेश बोहराले ४,हिक्मत महराले ३,सन्तोश चन्दले २ विकेट लिए ।

त्यसअघि यसअघि दशरथचन्द क्रिकेट मैदान,सुन्दरखालीमा टस हारेर पहिला ब्याटिङ गरेको बैतडीले निर्धारित ५० ओभरमा ८ विकेटको क्षतिमा २ सय ८० रन बनायो । जसमा प्रदीप चन्द र आयुश चन्दले अर्धशतकीय इनिङ खेलेका थिए । प्रदीप ८३ र आयुश ५९ रनमा आउट भएका थिए ।

बझाङका लागि कप्तान सञ्जय बोहरा र अभिनाश सिंहले २-२ विकेट लिए । सुदूरपश्चिम प्रादेशिक क्रिकेट संघको आयोजना तथा बैतडी जिल्ला क्रिकेट संघको सहआयोजनामा पुस ८ गतेदेखि प्रतियोगिता सञ्चालन भएको थियोे ।

प्रादेशिक क्रिकेट संघले यसवर्षदेखि प्लेट र इलाइट च्याम्पियनसिप गरेर दुई चरणमा प्रदेश छनौट गरिररहेको छ। गत वर्षको प्रदेश छनौटमा सेमिफाइनल पुगेका टोलीले सोझै ईलिट च्याम्पियनसिप र सेमिफाइनलमा नपुगेका टोलीले प्लेट च्याम्पियनसिप खेलेका हुन्।