एजेन्सी – अफगानिस्तानले अन्तिम तथा तेस्रो टि२० आई खेलमा युएईलाई ४ विकेटले हराउँदै सिरिज उपाधि जितेको छ । तीन खेलको सिरिज अफगानिस्तानले २-१ ले जितेको हो ।

जितको लागि १ सय २७ रनको मध्यम विजयी लक्ष्य पछ्याएको अफगानिस्तानले १८.३ ओभरमा ६ विकेट गुमाउँदै पूरा गर्यो ।
अफगानिस्तानको जितमा ओपनर हज्रतुल्लाह जजाईले ३२ बलमा २ चौका र २ छक्कासहित सर्वाधिक ३६, रहमानउल्लाह गुरबाजले २०, इब्राहिम जद्रान २३, आजमतुल्लाह ओमरजाई १६ र मोहम्मद नाबी १ रनमा आउट भए । नाजिबुल्लाहा जद्रान १३ बलमा २ चौका र २ छक्कासहित २८ रनमा नट आउट रहे ।

युएईका तीव्र गतिका बलर जुनैद सिद्दिकले सर्वाधिक दुई विकेट लिए । आयन खान, ध्रुव पराशर, अली नासिर र मोहम्मद जवादुल्लाहले १-१ विकेट लिए ।

त्यसअघि शारजाहमा टस जितेर पहिला ब्याटिङ रोजेको युएईले निर्धारित २० ओभरमा ९ विकेट गुमाउँदै १ सय २६ रन बनाएको थियो । युएईका ओपनर तथा कप्तान मोहम्मद वासिमले २५ बलमा ४ चौकासहित सर्वाधिक २७ रन बनाए ।

अली नासिर २१, बासिल हामिद १२, आयन खान र अकिफ राजाले १०-१० रन बनाए । मोहम्मद जवादुल्लाहले १३ रन जोडे ।

अफगानिस्तानका युवा तीव्र गतिका बलर नविन उल हकले ४ ओभरमा २० रन खर्चेर ४ विकेट लिए । क्विस अहमदले ४ ओभरमा २४ रन खर्चेर ३ विकेट लिए । आजमतुल्लाह ओमरजाईले २ विकेट लिए । पहिलो खेलमा अफगानिस्तान ७२ रनले विजयी हुँदा दोस्रो खेल ११ रनले गुमाएको थियो ।