काठमाडौं (हाम्रो खेलकुद) – नेपाल क्रिकेट संघ (क्यान) ले २०२४ को आफ्नो वार्षिक क्यालेन्डर सार्वजनिक गर्दा टेस्ट टोलीसँग कुनैपनि खेल छैन । टेस्ट टोलीको ए सँग सिरिज भएपनि प्रमुख टोलीसँग खेल्ने कुनैपनि कार्यक्रम छैन ।

नेपालले टेस्ट टोलीको रुपमा १९ मार्च देखी ३० अप्रिल सम्म आयरल्यान्ड ए र नेपाल ए बीच घरेलु मैदानमा सिरिज खेल्नेछ । उक्त सिरिजमा पाँच एकदिवसीय र तीन टि२० हुनेछ ।

नेपालले २० मार्च देखी ५ अप्रिल सम्म घरेलु मैदानमा टि२० सिरिज खेल्न बंगलादेश, अफगानिस्तान र श्रीलंका ए जस्ता देशसँग प्रस्ताव गरेको छ । अन्य नेपालको टेस्ट टोलीसँग २०२४ मा कुनैपनि खेल घरेलु मैदानमा छैन । विदेशमा पनि टि२० विश्वकप बाहेक अन्य हालसम्म देखिएको छैन ।

नेपालका पूर्वकप्तान तथा क्यानका सचिव पारस खड्काले २०२४ मा नेपालले टेस्ट टोलीसँग घरेलु मैदानमा सिरिज खेल्न नसक्नुको बारे धारणा ब्यक्त गरेका छन् । जसमा मुख्य कारण नेपालको भौतिक पुर्वाधार रहेको बताएका छन् ।

‘नयाँ कार्यसमिति आएको हामी भर्खर साढे तीन महिना जस्तो भयो । अहिले को अहिले टेस्ट टोली आउँछ आउँदैन भन्ने कुरामा एउटा हामीले ध्यान दिनुपर्ने यो पनि हो की हाम्रो जुन पुर्वाधार छ । त्यो पुर्वाधारसँगै टेस्ट टोलीको एक वर्ष १५ महिना अघिनै क्यालेन्डर पक्का हुने गर्दछ’, पारसले भने ।

पारसले २०२५ मा घरेलु मैदानमा टेस्ट टोली आउने आशा ब्यक्त गरे । ‘आशा गरौं, अहिले नै हामीले टेस्ट टोलीलाई प्रस्ताव गरेका छौं । २०२५ मा हामी टेस्ट टोलीसँग घरेलु मैदानमा खेल्न चाहन्छौं भनेर प्रस्ताव गरि सकेका छौं, उनले भने । पारसले सरकारले पुर्वाधारमा लगानी गर्नुपर्ने पनि बताए ।

‘यसक्रममा हामीले खेलकुद मन्त्री र राखेका सदस्य सचिवलाई यो भनेका छौं कि टियु मैदानमा अव अलिकति लगानी गर्दिन पर्यो । त्यो लगानी गरेको खण्डमा टेस्ट टोली नेपाल आउन कुनै समस्या होईन । प्रस्ताव कसरी गछौं र पुर्वाधारको चुनौती छ । भर्खर नयाँ समिति आएकोमा प्रयासमा छ । आशा गरौं २०२५ मा हुनसक्छ । वा यहिँ वर्षपनि कुनै टेस्ट टोली तयार हुन्छ भने त्यो ढोका पनि खुल्ला राखेका छौं । पत्रचार गरि नै राखेका छौं ।’