काठमाडौं (हाम्रो खेलकुद) – ललितपुर जिल्लाले बागमती प्रदेश छनोटको फाइनलमा चितवन जिल्लालाई ५ विकेटले हराउँदै उपाधि जितेको छ । मंगलबार माथिल्लो मुलपानी क्रिकेट मैदानमा टस हारेर पहिला ब्याटिङको निम्तो पाएको चितवन ४५.२ ओभरमा १ सय ५२ रनमा अल आउट भयो ।

चितवनको लागि ओपनर रोशन झाले ४५ बलमा ४ चौका र ३ छक्कासहित सर्वाधिक ४९ रन बनाए । विकल कुमार गुप्ता २२, सुर्यांशु कोइराला १० र डानिस इकबालले २१ रन बनाए ।

ललितपुरका विपिन आचार्य र भगर्व खनालले समान तीन विकेट लिए । त्यस्तै पञ्कज पाण्डे, आयुश जैसवाल र आदिल खानले समान १-१ विकेट लिए ।

जितको लागि १ सय ५३ रनको सामान्य लक्ष्य ललितपुरले ३५.५ ओभरमा ५ विकेट गुमाउँदै पूरा गर्यो । ललितपुरका आशुतोष घिरैयाले १ सय २ बलमा १२ चौकासहित सर्वाधिक ८३ रनमा नट आउट रहे । अन्य ब्याटरले भने राम्रो प्रदर्शन गर्न सकेनन् । चितवनका डानिस इकबालले सर्वाधिक दुई विकेट लिए ।

यसअघि सेमिफाइनल खेलमा चितवनले काठमाडौंलाई तथा ललितपुरले नुवाकोटलाई हराएको थियो । प्रधानमन्त्री कप राष्ट्रिय एकदिवसीय प्रतियोगिता शनिबार देखी सुरु हुँदैछ । त्यसअघि सबै प्रदेश छनोट जारी छ ।