विनोदको शतक

काठमाडौं (हाम्रो खेलकुद) – त्रिभुवन आर्मी क्लबका कप्तान विनोद भण्डारीले प्रधानमन्त्री कप एकदिवसीय राष्ट्रिय प्रतियोगितामा मधेश प्रदेशविरुद्ध शतक प्रहार गरेका छन् । विनोदले ८९ बलमा प्रधानमन्त्री कप करिअरको दोस्रो शतक हाने ।

विनोद ९३ बलमा ९ चौका र ६ छक्कासहित १ सय १३ रनको शतकीय इनिङ खेले । उनी रन्जित कुमारको ४४ औं ओभरको पाँचौं बलमा प्वाइन्टमा मयन यादवबाट क्याच आउट भए ।

उनले यसअघि २०२१ को पिएम कपमा गण्डकी प्रदेशविरुद्ध १ सय ११ रनको शतकीय इनिङ खेलेका थिए । उनको करिअरको भने चौथो शतक हो ।

पिएमकपमा दीपेन्द्रसिंह ऐरीपछि दुई शतक प्रहार गर्ने उनी दोस्रो खेलाडी हुन् । पिएम कपको यो १७ औं शतक हो । दीपेन्द्र र विनोद बाहेक अन्य कुनैपनि ब्याटरले दुई शतक हानेका छैनन् ।

टियुमा टस हारेर पहिला ब्याटिङको निम्तो पाएको आर्मीले ४४ ओभरमा ६ विकेट गुमाउँदै २ सय ५५ रन बनाएकोछ । एक समय २०.५ ओभरमा १०२–५ को अवस्थामा पुगेको आर्मीलाई पाँचौं विकेटका लागि विनोद र कुशल मल्लले १ सय १८ बलमा १ सय ३२ रनको शतकीय साझेदारी गरेका थिए । कुशल ४४ बलमा २ चौका र २ छक्कासहित ३७ रनमा आउट भए ।