काठमाडौं (हाम्रो खेलकुद) – प्रधानमन्त्री कप २०२४ अन्तर्गत कोशी प्रदेशले लगातार पाँचौ हार बेहोरेको छ । टियु क्रिकेट मैदानमा शुक्रबार बागमती प्रदेशले लगातार तेस्रो जित दर्ता गर्ने क्रममा कोशीलाई ६४ रनले हराएको हो ।

ओपनर आशुतोष घिरैयाको शतकको मदतमा बागमतीले प्रस्तुत गरेको २ सय ७४ रनको लक्ष्य पछ्याउने क्रममा कोशीले ४७.१ ओभरमा ओभरमा अलआउट हुँदै २ सय ९ रन मात्र जोड्न सक्यो । कोशीका लागि सुजन थपलिया र कप्तान अंकित सुवेदीले अर्धशतक प्रहार गरेपनि अन्य ब्याटरले त्यसअनुसार योगदान दिन सकेनन् । यता बागमतीका लागि इशान पाण्डेले ५ विकेट लिँदै जितको आधार तय गरे ।

यस जितसँगै बागमती अंक तालिकाको दोस्रो स्थानमा उक्लिएको छ । ५ खेलमा बागमतीको ३ जित र २ हारसँगै ६ अंक छ । सुदूरपश्चिम ३ खेलमा शत प्रतिशत जितका साथ ६ अंक जोड्दै शीर्षस्थानमा छ । कोशी ५ खेलमा बिना कुनै अंक पुछारमा छ । गण्डकीले पनि ३ खेलमा कुनै अंक जोडेको छैन ।

बलियो लक्ष्य पछ्याउने क्रममा कोशीले १२ औं ओभरमा ४५ रन जोड्दा सोनु अन्सारीलाई गुमाएको थियो । २१ रन जोडेका सोनुलाई प्रतिक श्रेष्ठको बलमा अम्पायरले कट बिहाइन्ड आउट दिँदा उनी निकै असन्तुष्ट देखिएका थिए । त्यसपछि क्रिजमा आएका मिनाश थापा पहिलो बलमै रनआउट भए । प्रतियोगितामा चौथो खेल खेलेका उनले पुन: एकपटक रन जोड्न सकेनन् । ४ खेलमा उनले मात्र ३ रन जोडेका छन् ।

अंकित र सुजनले तेस्रो विकेटका लागि ६९ रनको साझेदारी गर्दै खेलमा कोशीको सम्भावना कायम राखेका थिए । अंकित ६५ बलमा ५३ रन जोड्दै २५ औं ओभरमा आउट भए । ४ चौका र २ छक्का प्रहार गरेका उनी इशान पाण्डेको बलमा क्याच आउट भए ।

त्यसपछि फिर्दोस अन्सारीले १८ बलमा ५ रन जोड्दै इशान पाण्डेकै बलिङमा क्याच फर्काए । सुभान गहतराज ८ बलमा ४ रन जोड्दै सूर्य तामाङको बलमा स्टम्प्ड आउट भए । अर्धशतक पूरा गरेका सुजन पनि सूर्यकै शिकार बने । ५९ रनमा खेलिरहँदा उनलाई सूर्यले बोल्ड गरेका थिए । सुजनले ७६ बलमा ५९ रन जोड्ने क्रममा ४ चौका र ३ छक्का प्रहार गरे ।

कोशीका लागि आइश भट्टराई ३८ बलमा ३२ रन जोड्दै नटआउट रहे । उनले ३ चौका जोडे । हेमन्त राई १० रन जोड्दै रिजन ढकालको बलमा आउट भए ।

बागमतीका लागि सूर्यले ४८ रन खर्चेर २ विकेट लिए । प्रतियोगिताको सर्वाधिक विकेट लिने खेलाडी उनले ५ खेलमा १९ विकेट लिइसकेका छन् । प्रतिकको नाममा पनि १ विकेट रह्यो ।

त्यसअघि टस हारेर ब्याटिङको निम्तो पाएका बागमतीका लागि आशुतोषले आक्रामक ब्याटिङ गर्दै करिअरको पहिलो शतक पूरा गरे । बागमतीले ४८.३ ओभरमा अलआउट हुनुअघि २ सय ७३ रन जोड्यो ।

आशुतोषले १ सय ११ बलमा १ सय १८ रन जोडे । उनले कुल १६ चौका र २ छक्का प्रहार गरे । आशुतोषले ९९ बलमा शतक पूरा गरे । कमल खत्रीको बलमा एज लाग्दै थर्ड म्यान तर्फ चौका गएपछि उनको शतक पूरा भएको थियो ।

आशुतोषले टोलीको स्कोर २८ रन रहँदा ओपनर इशान पाण्डेको साथ गुमाएका थिए । इशान ६ रन जोड्दै क्याच आउट भएका थिए । त्यसपछि रित र आशुतोषले बलियो साझेदारी गर्दै इनिङ सुदृढ बनाए ।

यी दुईले दोस्रो विकेटका लागि १ सय ३१ रनको साझेदारी गरे । रित ६० बलमा ३ चौकासहित ४९ रन जोड्दै विकेटकिपरको हातबाट समातिए ।

३३ औं ओभरमा हेमन्त राईको बलमा आशुतोष कमल खत्रीको हातबाट क्याच आउट भएका थिए । लामो सट खेल्ने धुनमा उनलाई लङ अनमा रहेका कमलले कुद्दै मिड अफसम्म आएर उत्कृष्ट क्याच लिएका थिए ।

कोशीविरुद्ध ४७ बलमा अर्धशतक पूरा गरेका आशुतोषलाई सुजन थपलियाले ४१ रनमा ड्रप गरेका थिए । टियु मैदानमै कोशीका लागि शतक बनाएका सुजनले स्लिपमा क्याच छोडेर जीवनदान दिएपछि आशुतोषले लगातार आक्रमण गरे ।

आशुतोष बागमती प्रदेशबाट शतक प्रहार गर्ने दोस्रो खेलाडी हुन् । यसअघि ज्ञानेन्द्र मल्लले २०१९ संस्करणमा एपिएफविरुद्ध शतक प्रहार गरेका थिए । जारी प्रतियोगितामा यो पाँचौ शतक पनि हो । टियु मैदानमा सुरुवाती ४ दिन लगातार शतक बनेको थियो ।

बागमतीका लागि विकेटकिपर रविन जोशीले ४३ रनको योगदान दिए । उनले ३ चौका र १ छक्का प्रहार गरे । एक समय ३ सय रनको आँकडा छुने सम्भावना देखिएको बागमती अन्त्यतिर भने लगातार विकेट पतनको शिकार बन्यो । बागमतीले अन्तिम ६ विकेट २२ रनको अन्तरमा गुमाएको थियो ।

कोशीका लागि अभ्यास तिम्सिनाले ३, कमल खत्री र हेमन्त राईले २-२ तथा फिर्दोश अन्सारीले १ विकेट लिए ।

तेस्रो पटक प्रधानमन्त्री कप खेलिरहेका आशुतोषले यसअघि पनि टियु मैदानमा भएको खेलमा राम्रो प्रदर्शन गरेका थिए । आशुतोषले यसअघि नेपाल पुलिस क्लबविरुद्ध पहिलो खेलमा ९२ रन जोडेका थिए । त्यसपछि नेपाल एपिएफ क्लबविरुद्ध पनि उनले ४१ रनको योगदान दिए ।

मुलपानीमा भएको मधेश र आर्मीविरुद्ध खेलमा भने उनले दोहोरो अंक छुन सकेका थिएनन् । ललितपुर जिल्लाबाट प्रदेश छनोट खेलेका उनले बागमती प्रदेशको छनोटमा सर्वोत्कृष्ट खेलाडी घोषित भएका थिए ।